Psaumes 26
Bible en Swahili de l’est

¹ Ee Bwana, unihukumu mimi, Maana nimekwenda kwa ukamilifu wangu, Nami nimemtumaini Bwana bila wasiwasi. ² Ee Bwana, unijaribu na kunipima; Unisafishe mtima wangu na moyo wangu. ³ Maana fadhili zako zi mbele ya macho yangu, Nami nimekwenda katika kweli yako. ⁴ Sikuketi pamoja na watu wa ubatili, Wala sitaingia mnamo wanafiki. ⁵ Nimelichukia kusanyiko la watenda mabaya, Wala sitaketi pamoja na watu waovu. ⁶ Nitanawa mikono yangu kwa kutokuwa na hatia, Na kuizunguka madhabahu yako, Ee Bwana ⁷ Ili niitangaze sauti ya kushukuru, Na kuzisimulia kazi zako za ajabu. ⁸ Bwana, nimependa makao ya nyumba yako, Na mahali pa maskani ya utukufu wako. ⁹ Usiiondoe nafsi yangu pamoja na wakosaji, Wala uhai wangu pamoja na watu wa damu. ¹⁰ Mikononi mwao mna madhara, Na mkono wao wa kuume umejaa rushwa. ¹¹ Ila mimi nitakwenda kwa ukamilifu wangu; Unikomboe, unifanyie fadhili. ¹² Mguu wangu umesimama palipo sawa; Katika makusanyiko nitamhimidi Bwana.