Psaumes 95.7
Bible en Swahili de l’est

¹ Njoni, tumwimbie Bwana, Tumfanyie shangwe mwamba wa wokovu wetu. ² Tuje mbele zake kwa shukrani, Tumfanyie shangwe kwa zaburi. ³ Kwa kuwa Bwana ni Mungu mkuu, Na Mfalme mkuu juu ya miungu yote. ⁴ Mkononi mwake zimo bonde za dunia, Hata vilele vya milima ni vyake. ⁵ Bahari ni yake, ndiye aliyeifanya, Na mikono yake iliumba nchi kavu. ⁶ Njoni, tuabudu, tusujudu, Tupige magoti mbele za Bwana aliyetuumba. ⁷ Kwa maana ndiye Mungu wetu, Na sisi tu watu wa malisho yake, Na kondoo za mkono wake. Ingekuwa heri leo msikie sauti yake! ⁸ Msifanye migumu mioyo yenu; Kama vile huko Meriba Kama siku ya Masa jangwani. ⁹ Hapo waliponijaribu baba zenu, Wakanipima, wakayaona matendo yangu. ¹⁰ Miaka arobaini nalihuzunika na kizazi kile, Nikasema, Hao ni watu waliopotoka mioyo, Hawakuzijua njia zangu. ¹¹ Nikaapa kwa hasira yangu Wasiingie rahani mwangu.