Psaumes 143.2
Bible en Swahili de l’est

¹ Ee Bwana, uisikie sala yangu, uzisikilize dua zangu, Kwa uaminifu wako unijibu kwa haki yako. ² Wala usimhukumu mtumishi wako, Maana kwako hakuna aliye hai mwenye haki. ³ Maana adui ameifuatia nafsi yangu, Ameutupa chini uzima wangu. Amenikalisha mahali penye giza, Kama watu waliokufa zamani. ⁴ Na roho yangu imezimia ndani yangu, Moyo wangu ndani yangu umesituka. ⁵ Nimezikumbuka siku za kale, Nimeyatafakari matendo yako yote, Naziwaza kazi za mikono yako. ⁶ Nakunyoshea mikono yangu; Nafsi yangu inakuonea kiu kama nchi kame. ⁷ Ee Bwana, unijibu hima, roho yangu imelegea; Usinifiche uso wako, Nisifanane nao washukao shimoni ⁸ Unifanye kusikia fadhili zako asubuhi, Kwa maana nimekutumaini Wewe. Unijulishe njia nitakayoiendea, Kwa maana nakuinulia nafsi yangu. ⁹ Ee Bwana, uniponye na adui zangu; Nimekukimbilia Wewe, unifiche. ¹⁰ Unifundishe kuyatenda mapenzi yako, Kwa maana ndiwe Mungu wangu; Roho yako mwema aniongoze kwenye nchi sawa, ¹¹ Ee Bwana, unihuishe kwa ajili ya jina lako, Kwa haki yako unitoe roho yangu taabuni; ¹² Kwa fadhili zako utawakatilia mbali adui zangu; Na kuwaangamiza wote wanitesao nafsi, Kwa maana mimi ni mtumishi wako.