Psaumes 97
Bible en Swahili de l’est

¹ Bwana ametamalaki, nchi na ishangilie, Visiwa vingi na vifurahi. ² Mawingu na giza vyamzunguka, Haki na hukumu ndio msingi wa kiti chake. ³ Moto hutangulia mbele zake, Nao huwateketeza watesi wake pande zote. ⁴ Umeme wake uliuangaza ulimwengu, Nchi ikaona ikatetemeka. ⁵ Milima iliyeyuka kama nta mbele za Bwana, Mbele za Bwana wa dunia yote. ⁶ Mbingu zimetangaza haki yake, Na watu wote wameuona utukufu wake. ⁷ Na waaibishwe wote waabuduo sanamu, Wajivunao kwa vitu visivyofaa; Enyi miungu yote, msujuduni Yeye. ⁸ Sayuni imesikia na kufurahi, Binti za Yuda walishangilia, Kwa sababu ya hukumu zako, Ee Bwana. ⁹ Maana Wewe, Bwana, ndiwe Uliye juu, Juu sana kuliko nchi yote; Umetukuka sana juu ya miungu yote. ¹⁰ Enyi mmpendao Bwana, uchukieni uovu; Huwalinda nafsi zao watauwa wake, Na kuwaokoa na mkono wa wasio haki. ¹¹ Nuru imemzukia mwenye haki, Na furaha wanyofu wa moyo. ¹² Enyi wenye haki, mmfurahieni Bwana, Na kulishukuru jina lake takatifu.