Psaumes 55.23
Bible en Swahili de l’est

Confiance du psalmiste trahie par un ami

¹ Ee Mungu, uisikilize sala yangu, Wala usijifiche nikuombapo rehema.
² Unisikilize na kunijibu, Nimetanga-tanga nikilalama na kuugua.
³ Kwa sababu ya sauti ya adui, Kwa sababu ya dhuluma yake yule mwovu. Kwa maana wananitupia uovu, Na kwa ghadhabu wananiudhi.
⁴ Moyo wangu unaumia ndani yangu, Na hofu za mauti zimeniangukia.
⁵ Hofu na tetemeko limenijia, Na hofu kubwa imenifunikiza.
⁶ Nikasema, Ningekuwa na mbawa kama njiwa, Ningerukia mbali na kustarehe.
⁷ Ningekwenda zangu mbali, Ningetua jangwani.
⁸ Ningefanya haraka kuzikimbia Dhoruba na tufani.
⁹ Ee Bwana, uwaangamize, uzichafue ndimi zao, Maana nimeona dhuluma na fitina katika mji.
¹⁰ Mchana na usiku huzunguka kutani mwake; Uovu na taabu zimo ndani yake;
¹¹ Tamaa mbaya zimo ndani yake; Dhuluma na hila haziondoki mitaani mwake.
¹² Kwa maana aliyetukana si adui; Kama ndivyo, ningevumilia. Aliyejitukuza juu yangu siye anichukiaye; Kama ndivyo, ningejificha asinione.
¹³ Bali ni wewe, mtu mwenzangu, Rafiki yangu, niliyejuana nawe sana.
¹⁴ Tulipeana shauri tamu; na kutembea Nyumbani mwa Mungu pamoja na mkutano.
¹⁵ Mauti na iwapate kwa ghafula, Na washuke kuzimu wangali hai, Maana uovu u makaoni mwao na katikati yao.
¹⁶ Nami nitamwita Mungu, Na Bwana ataniokoa;
¹⁷ Jioni, asubuhi, na adhuhuri nitalalama na kuugua, Naye ataisikia sauti yangu.
¹⁸ Ameiokoa nafsi yangu iwe salama, asinikaribie mtu, Maana walioshindana nami walikuwa wengi.
¹⁹ Mungu atasikia na kuwajibu; Ndiye Yeye akaaye tangu milele. Mageuzi ya mambo hayawapati hao, Kwa hiyo hawamchi Mungu.
²⁰ Amenyosha mkono awadhuru waliopatana naye, Amelihalifu agano lake.
²¹ Kinywa chake ni laini kuliko siagi, Bali moyo wake ni vita. Maneno yake ni mororo kuliko mafuta, Bali hayo ni panga wazi.
²² Umtwike Bwana mzigo wako naye atakutegemeza, Hatamwacha mwenye haki aondoshwe milele.
²³ Nawe, Ee Mungu, utawatelemsha, Walifikilie shimo la uharibifu; Watu wa damu na hila hawataishi nusu ya siku zao, Bali mimi nitakutumaini Wewe.