2 Thessaloniciens 3
Bible en Swahili de l’est

¹ Hatimaye, ndugu, tuombeeni, neno la Bwana liendelee, na kutukuzwa vile vile kama ilivyo kwenu; ² tukaokolewe na watu wasio haki, wabaya; maana si wote walio na imani. ³ Lakini Bwana ni mwaminifu, atakayewafanya imara na kuwalinda na yule mwovu. ⁴ Nasi tumemtumaini Bwana kwa mambo yenu, kwamba mnayafanya tulivyowaagiza, tena kwamba mtayafanya. ⁵ Bwana awaongoze mioyo yenu mkapate pendo la Mungu, na saburi ya Kristo. ⁶ Ndugu, twawaagiza katika jina la Bwana Yesu Kristo, jitengeni nafsi zenu na kila ndugu aendaye bila utaratibu, wala si kwa kufuata mapokeo mliyoyapokea kwetu. ⁷ Mwajua wenyewe jinsi iwapasavyo kutufuata; kwa sababu hatukuenda bila utaratibu kwenu; ⁸ wala hatukula chakula kwa mtu ye yote bure; bali kwa taabu na masumbufu, usiku na mchana tulitenda kazi, ili tusimlemee mtu wa kwenu awaye yote. ⁹ Si kwamba hatuna amri, lakini makusudi tufanye nafsi zetu kuwa kielelezo kwenu, mtufuate. ¹⁰ Kwa kuwa hata wakati ule tulipokuwapo kwenu tuliwaagiza neno hili, kwamba ikiwa mtu hataki kufanya kazi, basi, asile chakula. ¹¹ Maana twasikia kwamba wako watu kwenu waendao bila utaratibu, hawana shughuli zao wenyewe, lakini wanajishughulisha na mambo ya wengine. ¹² Basi twawaagiza hao, na kuwaonya katika Bwana Yesu Kristo, watende kazi kwa utulivu na kula chakula chao wenyewe. ¹³ Lakini ninyi, ndugu, msikate tamaa katika kutenda mema. ¹⁴ Na ikiwa mtu awaye yote halishiki neno letu la waraka huu, jihadharini na mtu huyo, wala msizungumze naye, apate kutahayari; ¹⁵ lakini msimhesabu kuwa adui, bali mwonyeni kama ndugu. ¹⁶ Sasa, Bwana wa amani mwenyewe na awape amani daima kwa njia zote. Bwana awe pamoja nanyi nyote. ¹⁷ Salamu zangu mimi Paulo, kwa mkono wangu mwenyewe. Hii ndiyo alama katika kila waraka, ndio mwandiko wangu. ¹⁸ Neema ya Bwana wetu Yesu Kristo na iwe pamoja nanyi nyote.