Cantique 7.9
Vulgate

Les filles de Jérusalem

¹ revertere revertere Sulamitis revertere revertere ut intueamur te

Le jeune homme

² quid videbis in Sulamiten nisi choros castrorum quam pulchri sunt gressus tui in calciamentis filia principis iunctura feminum tuorum sicut monilia quae fabricata sunt manu artificis
³ umbilicus tuus crater tornatilis numquam indigens poculis venter tuus sicut acervus tritici vallatus liliis
⁴ duo ubera tua sicut duo hinuli gemelli capreae
⁵ collum tuum sicut turris eburnea oculi tui sicut piscinae in Esebon quae sunt in porta filiae multitudinis nasus tuus sicut turris Libani quae respicit contra Damascum
⁶ caput tuum ut Carmelus et comae capitis tui sicut purpura regis vincta canalibus
⁷ quam pulchra es et quam decora carissima in deliciis
⁸ statura tua adsimilata est palmae et ubera tua botris
⁹ dixi ascendam in palmam adprehendam fructus eius et erunt ubera tua sicut botri vineae et odor oris tui sicut malorum
¹⁰ guttur tuum sicut vinum optimum dignum dilecto meo ad potandum labiisque et dentibus illius ruminandum
¹¹ ego dilecto meo et ad me conversio eius
¹² veni dilecte mi egrediamur in agrum commoremur in villis
¹³ mane surgamus ad vineas videamus si floruit vinea si flores fructus parturiunt si floruerunt mala punica ibi dabo tibi ubera mea
¹⁴ mandragorae dederunt odorem in portis nostris omnia poma nova et vetera dilecte mi servavi tibi