2 Timothée 3.17
Vulgate

¹ hoc autem scito quod in novissimis diebus instabunt tempora periculosa ² et erunt homines se ipsos amantes cupidi elati superbi blasphemi parentibus inoboedientes ingrati scelesti ³ sine affectione sine pace criminatores incontinentes inmites sine benignitate ⁴ proditores protervi tumidi voluptatium amatores magis quam Dei ⁵ habentes speciem quidem pietatis virtutem autem eius abnegantes et hos devita ⁶ ex his enim sunt qui penetrant domos et captivas ducunt mulierculas oneratas peccatis quae ducuntur variis desideriis ⁷ semper discentes et numquam ad scientiam veritatis pervenientes ⁸ quemadmodum autem Iannes et Mambres restiterunt Mosi ita et hii resistunt veritati homines corrupti mente reprobi circa fidem ⁹ sed ultra non proficient insipientia enim eorum manifesta erit omnibus sicut et illorum fuit ¹⁰ tu autem adsecutus es meam doctrinam institutionem propositum fidem longanimitatem dilectionem patientiam ¹¹ persecutiones passiones qualia mihi facta sunt Antiochiae Iconii Lystris quales persecutiones sustinui et ex omnibus me eripuit Dominus ¹² et omnes qui volunt pie vivere in Christo Iesu persecutionem patientur ¹³ mali autem homines et seductores proficient in peius errantes et in errorem mittentes ¹⁴ tu vero permane in his quae didicisti et credita sunt tibi sciens a quo didiceris ¹⁵ et quia ab infantia sacras litteras nosti quae te possint instruere ad salutem per fidem quae est in Christo Iesu ¹⁶ omnis scriptura divinitus inspirata et utilis ad docendum ad arguendum ad corrigendum ad erudiendum in iustitia ¹⁷ ut perfectus sit homo Dei ad omne opus bonum instructus