Psaumes 92.4
Bible en Swahili de l’est

¹ Ni neno jema kumshukuru Bwana, Na kuliimbia jina lako, Ee Uliye juu. ² Kuzitangaza rehema zako asubuhi, Na uaminifu wako wakati wa usiku. ³ Kwa chombo chenye nyuzi kumi, Na kwa kinanda, Na kwa mlio wa kinubi. ⁴ Kwa kuwa umenifurahisha, Bwana, Kwa kazi yako; nitashangilia Kwa ajili ya matendo ya mikono yako. ⁵ Ee Bwana, jinsi yalivyo makuu matendo yako! Mawazo yako ni mafumbo makubwa. ⁶ Mtu mjinga hayatambui hayo, Wala mpumbavu hayafahamu. ⁷ Wasio haki wakichipuka kama majani Na wote watendao maovu wakistawi. Ni kwa kusudi waangamizwe milele; ⁸ Bali Wewe, Bwana, U Mtukufu hata milele. ⁹ Maana hao adui zako, Ee Bwana, Hao adui zako watapotea, Na watendao maovu watatawanyika wote pia. ¹⁰ Bali pembe yangu umeiinua kama pembe ya nyati, Nimepakwa mafuta mabichi. ¹¹ Na jicho langu limewatazama walioniotea, Sikio langu limesikia habari za waovu walionishambulia. ¹² Mwenye haki atasitawi kama mtende, Atakua kama mwerezi wa Lebanoni. ¹³ Waliopandwa katika nyumba ya Bwana Watasitawi katika nyua za Mungu wetu. ¹⁴ Watazaa matunda hadi wakati wa uzee, Watajaa utomvu, watakuwa na ubichi. ¹⁵ Watangaze ya kuwa Bwana ni mwenye adili, Mwamba wangu, ndani yake hamna udhalimu.