2 Pierre 3
Vulgate

¹ hanc ecce vobis carissimi secundam scribo epistulam in quibus excito vestram in commonitione sinceram mentem ² ut memores sitis eorum quae praedixi verborum a sanctis prophetis et apostolorum vestrorum praeceptorum Domini et salvatoris ³ hoc primum scientes quod venient in novissimis diebus in deceptione inlusores iuxta proprias concupiscentias ambulantes ⁴ dicentes ubi est promissio aut adventus eius ex quo enim patres dormierunt omnia sic perseverant ab initio creaturae ⁵ latet enim eos hoc volentes quod caeli erant prius et terra de aqua et per aquam consistens Dei verbo ⁶ per quae ille tunc mundus aqua inundatus periit ⁷ caeli autem qui nunc sunt et terra eodem verbo repositi sunt igni servati in diem iudicii et perditionis impiorum hominum ⁸ unum vero hoc non lateat vos carissimi quia unus dies apud Dominum sicut mille anni et mille anni sicut dies unus ⁹ non tardat Dominus promissi sed patienter agit propter vos nolens aliquos perire sed omnes ad paenitentiam reverti ¹⁰ adveniet autem dies Domini ut fur in qua caeli magno impetu transient elementa vero calore solventur ¹¹ cum haec igitur omnia dissolvenda sint quales oportet esse vos in sanctis conversationibus et pietatibus ¹² expectantes et properantes in adventum Dei diei per quam caeli ardentes solventur et elementa ignis ardore tabescent ¹³ novos vero caelos et novam terram et promissa ipsius expectamus in quibus iustitia habitat ¹⁴ propter quod carissimi haec expectantes satis agite inmaculati et inviolati ei inveniri in pace ¹⁵ et Domini nostri longanimitatem salutem arbitramini sicut et carissimus frater noster Paulus secundum datam sibi sapientiam scripsit vobis ¹⁶ sicut et in omnibus epistulis loquens in eis de his in quibus sunt quaedam difficilia intellectu quae indocti et instabiles depravant sicut et ceteras scripturas ad suam ipsorum perditionem ¹⁷ vos igitur fratres praescientes custodite ne insipientium errore transducti excidatis a propria firmitate ¹⁸ crescite vero in gratia et in cognitione Domini nostri et salvatoris Iesu Christi ipsi gloria et nunc et in die aeternitatis amen