Psaumes 49.7
Bible en Swahili de l’est

Futilité des richesses

¹ Sikieni haya, enyi mataifa yote; Sikilizeni, ninyi nyote mnaokaa duniani.
² Watu wakuu na watu wadogo wote pia, Tajiri na maskini wote pamoja.
³ Kinywa changu kitanena hekima, Na fikira za moyo wangu zitakuwa za busara.
⁴ Nitatega sikio langu nisikie mithali, Na kufumbua fumbo langu kwa kinubi
⁵ Kwa nini niogope siku za uovu, Ubaya ukinizunguka miguuni pangu?
⁶ Wa hao wanaozitumainia mali zao, Na kujisifia wingi wa utajiri wao;
⁷ Hakuna mtu awezaye kumkomboa ndugu yake, Wala kumpa Mungu fidia kwa ajili yake,
⁸ (Maana fidia ya nafsi zao ina gharama, Wala hana budi kuiacha hata milele;)
⁹ ili aishi sikuzote asilione kaburi.
¹⁰ Naam, ataliona, hata wenye hekima hufa; Mpumbavu na mjinga hupotea pamoja, Na kuwaachia wengine mali zao.
¹¹ Makaburi ni nyumba zao hata milele, Maskani zao vizazi hata vizazi. Hao waliotaja mashamba yao Kwa majina yao wenyewe.
¹² Lakini mwanadamu hadumu katika heshima, Bali amefanana na wanyama wapoteao.
¹³ Hiyo ndiyo njia yao, ujinga wao, Nao walioko baada yao huyaridhia maneno yao.
¹⁴ Kama kondoo wamewekwa kwenda kuzimu, Na mauti itawachunga; Watu wanyofu watawamiliki asubuhi; Umbo lao litachakaa, kao lao ni kuzimu.
¹⁵ Bali Mungu atanikomboa nafsi yangu, Atanitoa mkononi mwa kuzimu, maana atanikaribisha.
¹⁶ Usiogope mtu atakapopata utajiri, Na fahari ya nyumba yake itakapozidi.
¹⁷ Maana atakapokufa hatachukua cho chote; Utukufu wake hautashuka ukimfuata.
¹⁸ Ajapojibariki nafsi yake alipokuwa hai, Na watu watakusifu ukijitendea mema,
¹⁹ Atakwenda kwenye kizazi cha baba zake Hawataona nuru hata milele.
²⁰ Mwanadamu mwenye heshima, iwapo hana akili, Amefanana na wanyama wapoteao.