Osée 12.4
Vulgate

Israël et son ancêtre Jacob

¹ circumdedit me in negatione Ephraim et in dolo domus Israël Judas autem testis descendit cum Deo et cum sanctis fidelis
² Ephraim pascit ventum et sequitur aestum tota die mendacium et vastitatem multiplicat et foedus cum Assyriis iniit et oleum in Aegyptum ferebat
³ iudicium ergo Domini cum Iuda et visitatio super Iacob iuxta vias eius et iuxta adinventiones eius reddet ei
⁴ in utero subplantavit fratrem suum et in fortitudine sua directus est cum angelo
⁵ et invaluit ad angelum et confortatus est flevit et rogavit eum in Bethel invenit eum et ibi locutus est nobiscum
⁶ et Dominus Deus exercituum Dominus memoriale eius
⁷ et tu ad Deum tuum converteris misericordiam et iudicium custodi et spera in Deo tuo semper
⁸ Chanaan in manu eius statera dolosa calumniam dilexit
⁹ et dixit Ephraim verumtamen dives effectus sum inveni idolum mihi omnes labores mei non invenient mihi iniquitatem quam peccavi
¹⁰ et ego Dominus Deus tuus ex terra Aegypti adhuc sedere te faciam in tabernaculis sicut in diebus festivitatis
¹¹ et locutus sum super prophetas et ego visionem multiplicavi et in manu prophetarum adsimilatus sum
¹² si Galaad idolum tamen frustra erant in Galgal bubus immolantes nam et altaria eorum quasi acervi super sulcos agri
¹³ fugit Iacob in regionem Syriae et servivit Israhel in uxore et in uxore servavit
¹⁴ in propheta autem eduxit Dominus Israhel de Aegypto et in propheta servatus est
¹⁵ ad iracundiam me provocavit Ephraim in amaritudinibus suis et sanguis eius super eum veniet et obprobrium eius restituet ei Dominus suus