Psaumes 25
Bible en Swahili de l’est

¹ Ee Bwana, nakuinulia nafsi yangu, ² Ee Mungu wangu, Nimekutumaini Wewe, nisiaibike, Adui zangu wasifurahi kwa kunishinda. ³ Naam, wakungojao hawataaibika hata mmoja; Wataaibika watendao uhaini bila sababu. ⁴ Ee Bwana, unijulishe njia zako, Unifundishe mapito yako, ⁵ Uniongoze katika kweli yako, Na kunifundisha. Maana Wewe ndiwe Mungu wa wokovu wangu, Nakungoja Wewe mchana kutwa. ⁶ Ee Bwana, kumbuka rehema zako na fadhili zako, Maana zimekuwako tokea zamani. ⁷ Usiyakumbuke makosa ya ujana wangu, Wala maasi yangu. Unikumbuke kwa kadiri ya fadhili zako, Ee Bwana kwa ajili ya wema wako. ⁸ Bwana yu mwema, mwenye adili, Kwa hiyo atawafundisha wenye dhambi njia. ⁹ Wenye upole atawaongoza katika hukumu, Wenye upole atawafundisha njia yake. ¹⁰ Njia zote za Bwana ni fadhili na kweli, Kwao walishikao agano lake na shuhuda zake. ¹¹ Ee Bwana, kwa ajili ya jina lako, Unisamehe uovu wangu, maana ni mwingi. ¹² Ni nani amchaye Bwana? Atamfundisha katika njia anayoichagua. ¹³ Nafsi yake itakaa hali ya kufanikiwa; Wazao wake watairithi nchi. ¹⁴ Siri ya Bwana iko kwao wamchao, Naye atawajulisha agano lake. ¹⁵ Macho yangu humwelekea Bwana daima, Naye atanitoa miguu yangu katika wavu. ¹⁶ Uniangalie na kunifadhili, Maana mimi ni mkiwa na mteswa. ¹⁷ Katika shida za moyo wangu unifanyie nafasi, Na kunitoa katika dhiki zangu. ¹⁸ Utazame teso langu na taabu yangu; Unisamehe dhambi zangu zote. ¹⁹ Uwatazame adui zangu, maana ni wengi, Wananichukia kwa machukio ya ukali. ²⁰ Unilinde nafsi yangu na kuniponya, Nisiaibike, maana nakukimbilia Wewe. ²¹ Ukamilifu na unyofu zinihifadhi, Maana nakungoja Wewe. ²² Ee Mungu, umkomboe Israeli, Katika taabu zake zote.