Psaumes 59
Bible en Swahili de l’est

¹ Ee Mungu wangu, uniponye na adui zangu, Uniinue juu yao wanaoshindana nami. ² Uniponye nao wafanyao maovu, Uniokoe na watu wa damu. ³ Kwa maana wanaiotea nafsi yangu; Wenye nguvu wamenikusanyikia; Ee Bwana, si kwa kosa langu, Wala si kwa hatia yangu. ⁴ Bila kosa langu huenda mbio, hujiweka tayari; Uamke uonane nami, na kutazama. ⁵ Na Wewe, Bwana, Mungu wa majeshi, Mungu wa Israeli, uamke. Uwapatilize mataifa yote; Usiwarehemu waovu wafanyao uovu hata mmoja. ⁶ Wakati wa jioni hurudi, hulia kama mbwa, Na kuzunguka-zunguka mjini. ⁷ Tazama, kwa vinywa vyao huteuka, Midomoni mwao mna panga, Kwa maana ni nani asikiaye? ⁸ Na Wewe, Bwana, utawacheka, Utawadhihaki mataifa yote. ⁹ Ee nguvu zangu, nitakungoja Wewe, Maana Mungu ndiye aliye ngome yangu ¹⁰ Mungu wa fadhili zangu atanitangulia, Mungu atanijalia kuwatazama adui zangu. ¹¹ Usiwaue, watu wangu wasije wakasahau; Uwatawanye kwa uweza wako, Na kuwaangamiza, Ee Bwana, ngao yetu. ¹² Kwa dhambi ya kinywa chao, Na kwa neno la midomo yao, Wanaswe kwa kiburi chao, Kwa ajili ya kulaani na uongo wasemao. ¹³ Uwakomeshe kwa hasira, Uwakomeshe watoweke, Wajue ya kuwa Mungu atawala katika Yakobo, Na hata miisho ya dunia. ¹⁴ Wakati wa jioni hurudi, hulia kama mbwa, Na kuzunguka-zunguka mjini. ¹⁵ Watatanga-tanga hao wakitafuta chakula; Wasiposhiba watakesha usiku kucha. ¹⁶ Nami nitaziimba nguvu zako asubuhi, Nitaziimba fadhili zako kwa furaha. Kwa kuwa ndiwe uliyekuwa ngome yangu, Na makimbilio siku ya shida yangu. ¹⁷ Ee nguvu zangu, nitakuimbia kwa furaha, Maana Mungu ndiye aliye ngome yangu, Mungu wa fadhili zangu.