Hébreux 13.23
Vulgate

¹ caritas fraternitatis maneat ² hospitalitatem nolite oblivisci per hanc enim latuerunt quidam angelis hospitio receptis ³ mementote vinctorum tamquam simul vincti et laborantium tamquam et ipsi in corpore morantes ⁴ honorabile conubium in omnibus et torus inmaculatus fornicatores enim et adulteros iudicabit Deus ⁵ sint mores sine avaritia contenti praesentibus ipse enim dixit non te deseram neque derelinquam ⁶ ita ut confidenter dicamus Dominus mihi adiutor non timebo quid faciat mihi homo ⁷ mementote praepositorum vestrorum qui vobis locuti sunt verbum Dei quorum intuentes exitum conversationis imitamini fidem ⁸ Iesus Christus heri et hodie ipse et in saecula ⁹ doctrinis variis et peregrinis nolite abduci optimum enim est gratia stabiliri cor non escis quae non profuerunt ambulantibus in eis ¹⁰ habemus altare de quo edere non habent potestatem qui tabernaculo deserviunt ¹¹ quorum enim animalium infertur sanguis pro peccato in sancta per pontificem horum corpora cremantur extra castra ¹² propter quod et Iesus ut sanctificaret per suum sanguinem populum extra portam passus est ¹³ exeamus igitur ad eum extra castra inproperium eius portantes ¹⁴ non enim habemus hic manentem civitatem sed futuram inquirimus ¹⁵ per ipsum ergo offeramus hostiam laudis semper Deo id est fructum labiorum confitentium nomini eius ¹⁶ beneficientiae autem et communionis nolite oblivisci talibus enim hostiis promeretur Deus ¹⁷ oboedite praepositis vestris et subiacete eis ipsi enim pervigilant quasi rationem pro animabus vestris reddituri ut cum gaudio hoc faciant et non gementes hoc enim non expedit vobis ¹⁸ orate pro nobis confidimus enim quia bonam conscientiam habemus in omnibus bene volentes conversari ¹⁹ amplius autem deprecor vos hoc facere ut quo celerius restituar vobis ²⁰ Deus autem pacis qui eduxit de mortuis pastorem magnum ovium in sanguine testamenti aeterni Dominum nostrum Iesum ²¹ aptet vos in omni bono ut faciatis voluntatem eius faciens in vobis quod placeat coram se per Iesum Christum cui gloria in saecula saeculorum amen ²² rogo autem vos fratres sufferatis verbum solacii etenim perpaucis scripsi vobis ²³ cognoscite fratrem nostrum Timotheum dimissum cum quo si celerius venerit videbo vos ²⁴ salutate omnes praepositos vestros et omnes sanctos salutant vos de Italia ²⁵ gratia cum omnibus vobis amen