Job 14.6
Bible en Swahili de l’est

¹ Mwanadamu aliyezaliwa na mwanamke Siku zake za kuishi si nyingi, naye hujaa taabu.
² Yeye huchanua kama vile ua, kisha hukatwa; Hukimbia kama kivuli, wala hakai kamwe.
³ Nawe, je! Wafumbua macho yako kumwangalia mtu kama yeye, Na kunitia katika hukumu pamoja nawe?
⁴ Ni nani awezaye kutoa kitu kilicho safi kitoke katika kitu kichafu? Hapana awezaye.
⁵ Kwa kuwa siku zake zimeamriwa, hesabu ya miezi yake unayo wewe, Nawe umemwekea mipaka yake asiyoweza kuipita;
⁶ Acha kumwangalia yeye, apate kupumzika, Hata atakapoitimiza siku yake, kama aliyeajiriwa.
⁷ Kwani yako matumaini ya mti, ya kuwa ukikatwa utachipuka tena, Wala machipukizi yake hayatakoma.
⁸ Ijapokuwa mizizi yake huchakaa mchangani, Na shina lake kufa katika udongo;
⁹ Lakini kwa harufu ya maji utachipuka, Na kutoa matawi kama mche.
¹⁰ Lakini mwanadamu hufa, huifariki dunia; Naam, mwanadamu hutoa roho, naye yupo wapi?
¹¹ Kama vile maji kupwa katika bahari, Na mto kupunguka na kukatika;
¹² Ni vivyo mwanadamu hulala chini, asiinuke; Hata wakati wa mbingu kutokuwako tena, hawataamka, Wala kuamshwa usingizini.
¹³ Laiti ungenificha kuzimuni, Ukanilinda kwa siri, hata ghadhabu zako zitakapopita, Na kuniandikia muda ulioamriwa, na kunikumbuka!
¹⁴ Mtu akifa, je! Atakuwa hai tena? Mimi ningengoja siku zote za vita vyangu, Hata kufunguliwa kwangu kunifikilie.
¹⁵ Wewe ungeita, nami ningekujibu; Ungekuwa na tamaa ya kazi ya mikono yako.
¹⁶ Lakini sasa wazihesabu hatua zangu; Je! Huchungulii dhambi yangu?
¹⁷ Kosa langu limetiwa muhuri mfukoni, Nawe waufunga uovu wangu.
¹⁸ Lakini, tazama, mlima ukianguka hutoweka, Nalo jabali huondolewa mahali pake;
¹⁹ Maji mengi huyapunguza mawe; Mafuriko yake huuchukua mchanga wa nchi; Nawe matumaini ya wanadamu wayaangamiza.
²⁰ Wewe wamshinda nguvu sikuzote, naye hupita aende zake Wabadili sura zake, na kumpeleka aondoke.
²¹ Wanawe hufikilia heshima, wala yeye hajui; Kisha wao huaibishwa, lakini yeye hana habari zao.
²² Lakini mwili ulio juu yake una maumivu, Na nafsi yake ndani huomboleza.