Actes 14
Vulgate

¹ factum est autem Iconii ut simul introirent synagogam Iudaeorum et loquerentur ita ut crederet Iudaeorum et Graecorum copiosa multitudo ² qui vero increduli fuerunt Iudaei suscitaverunt et ad iracundiam concitaverunt animas gentium adversus fratres ³ multo igitur tempore demorati sunt fiducialiter agentes in Domino testimonium perhibente verbo gratiae suae dante signa et prodigia fieri per manus eorum ⁴ divisa est autem multitudo civitatis et quidam quidem erant cum Iudaeis quidam vero cum apostolis ⁵ cum autem factus esset impetus gentilium et Iudaeorum cum principibus suis ut contumeliis adficerent et lapidarent eos ⁶ intellegentes confugerunt ad civitates Lycaoniae Lystram et Derben et universam in circuitu regionem ⁷ et ibi evangelizantes erant ⁸ et quidam vir in Lystris infirmus pedibus sedebat claudus ex utero matris suae qui numquam ambulaverat ⁹ hic audivit Paulum loquentem qui intuitus eum et videns quia haberet fidem ut salvus fieret ¹⁰ dixit magna voce surge super pedes tuos rectus et exilivit et ambulabat ¹¹ turbae autem cum vidissent quod fecerat Paulus levaverunt vocem suam lycaonice dicentes dii similes facti hominibus descenderunt ad nos ¹² et vocabant Barnaban Iovem Paulum vero Mercurium quoniam ipse erat dux verbi ¹³ sacerdos quoque Iovis qui erat ante civitatem tauros et coronas ante ianuas adferens cum populis volebat sacrificare ¹⁴ quod ubi audierunt apostoli Barnabas et Paulus conscissis tunicis suis exilierunt in turbas clamantes ¹⁵ et dicentes viri quid haec facitis et nos mortales sumus similes vobis homines adnuntiantes vobis ab his vanis converti ad Deum vivum qui fecit caelum et terram et mare et omnia quae in eis sunt ¹⁶ qui in praeteritis generationibus dimisit omnes gentes ingredi in vias suas ¹⁷ et quidem non sine testimonio semet ipsum reliquit benefaciens de caelo dans pluvias et tempora fructifera implens cibo et laetitia corda vestra ¹⁸ et haec dicentes vix sedaverunt turbas ne sibi immolarent ¹⁹ supervenerunt autem quidam ab Antiochia et Iconio Iudaei et persuasis turbis lapidantesque Paulum traxerunt extra civitatem aestimantes eum mortuum esse ²⁰ circumdantibus autem eum discipulis surgens intravit civitatem et postera die profectus est cum Barnaba in Derben ²¹ cumque evangelizassent civitati illi et docuissent multos reversi sunt Lystram et Iconium et Antiochiam ²² confirmantes animas discipulorum exhortantes ut permanerent in fide et quoniam per multas tribulationes oportet nos intrare in regnum Dei ²³ et cum constituissent illis per singulas ecclesias presbyteros et orassent cum ieiunationibus commendaverunt eos Domino in quem crediderunt ²⁴ transeuntesque Pisidiam venerunt Pamphiliam ²⁵ et loquentes in Pergen verbum Domini descenderunt in Attaliam ²⁶ et inde navigaverunt Antiochiam unde erant traditi gratiae Dei in opus quod conpleverunt ²⁷ cum autem venissent et congregassent ecclesiam rettulerunt quanta fecisset Deus cum illis quia aperuisset gentibus ostium fidei ²⁸ morati sunt autem tempus non modicum cum discipulis