Psaumes 51.15
Bible en Swahili de l’est

Psaume de retour à Dieu

¹ Ee Mungu, unirehemu, Sawasawa na fadhili zako. Kiasi cha wingi wa rehema zako, Uyafute makosa yangu.
² Unioshe kabisa na uovu wangu, Unitakase dhambi zangu.
³ Maana nimejua mimi makosa yangu Na dhambi yangu i mbele yangu daima.
⁴ Nimekutenda dhambi Wewe peke yako, Na kufanya maovu mbele za macho yako. Wewe ujulikane kuwa una haki unenapo, Na kuwa safi utoapo hukumu.
⁵ Tazama, mimi naliumbwa katika hali ya uovu; Mama yangu alinichukua mimba hatiani.
⁶ Tazama, wapendezwa na kweli iliyo moyoni; Nawe utanijulisha hekima kwa siri,
⁷ Unisafishe kwa hisopo nami nitakuwa safi, Unioshe, nami nitakuwa mweupe kuliko theluji
⁸ Unifanye kusikia furaha na shangwe, Mifupa uliyoiponda ifurahi.
⁹ Usitiri uso wako usitazame dhambi zangu; Uzifute hatia zangu zote.
¹⁰ Ee Mungu, uniumbie moyo safi, Uifanye upya roho iliyotulia ndani yangu
¹¹ Usinitenge na uso wako, Wala roho yako mtakatifu usiniondolee.
¹² Unirudishie furaha ya wokovu wako; Unitegemeze kwa roho ya wepesi.
¹³ Nitawafundisha wakosaji njia zako, Na wenye dhambi watarejea kwako.
¹⁴ Ee MUNGU, Mungu wa wokovu wangu, Uniponye na damu za watu, Na ulimi wangu utaiimba haki yako.
¹⁵ Ee Bwana, uifumbue midomo yangu, Na kinywa changu kitazinena sifa zako.
¹⁶ Maana hupendezwi na dhabihu, au ningeitoa, Wewe huridhii sadaka ya kuteketezwa.
¹⁷ Dhabihu za Mungu ni roho iliyovunjika; Moyo uliovunjika na kupondeka, Ee Mungu, hutaudharau.
¹⁸ Uitendee mema Sayuni kwa radhi yako, Uzijenge kuta za Yerusalemu.
¹⁹ Ndipo utakapopendezwa na dhabihu za haki, Na sadaka za kuteketezwa, na kafara. Ndipo watakapotoa ng’ombe Juu ya madhabahu yako.