Psaumes 7.12
Bible en Swahili de l’est

Prière du juste persécuté

¹ Bwana, Mungu wangu, nimekukimbilia Wewe, Uniokoe na wote wanaonifuatia, uniponye.
² Asije akaipapura nafsi yangu kama simba, Akiivunja-vunja pasipokuwa na wa kuponya.
³ Bwana, Mungu wangu, ikiwa nimetenda haya, Ikiwa mna uovu mikononi mwangu,
⁴ Ikiwa nimemlipa mabaya Yeye aliyekaa kwangu salama; (Hasha! Nimemponya yeye Aliyekuwa mtesi wangu bila sababu;)
⁵ Basi adui na anifuatie, Na kuikamata nafsi yangu; Naam, aukanyage uzima wangu, Na kuulaza utukufu wangu mavumbini.
⁶ Bwana uondoke kwa hasira yako; Ujiinue juu ya jeuri ya watesi wangu; Uamke kwa ajili yangu; Umeamuru hukumu.
⁷ Kusanyiko la mataifa na likuzunguke, Na juu yake uketi utawale.
⁸ Bwana atawaamua mataifa, Bwana, unihukumu mimi, Kwa kadiri ya haki yangu, Sawasawa na unyofu nilio nao.
⁹ Ubaya wao wasio haki na ukome, Lakini umthibitishe mwenye haki. Kwa maana mjaribu mioyo na viuno Ndiye Mungu aliye mwenye haki.
¹⁰ Ngao yangu ina Mungu, Awaokoaye wanyofu wa moyo.
¹¹ Mungu ni mwamuzi mwenye haki, Naam, Mungu aghadhibikaye kila siku.
¹² Mtu asiporejea ataunoa upanga wake; Ameupinda uta wake na kuuweka tayari;
¹³ Naye amemtengenezea silaha za kufisha, Akifanya mishale yake kuwa ya moto.
¹⁴ Tazama, huyu ana utungu wa uovu, Amechukua mimba ya madhara, amezaa uongo.
¹⁵ Amechimba shimo, amelichimba chini sana, Akatumbukia katika handaki aliyoifanya!
¹⁶ Madhara yake yatamrejea kichwani pake, Na dhuluma yake itamshukia utosini.
¹⁷ Nitamshukuru Bwana kwa kadiri ya haki yake; Nitaliimbia jina la Bwana aliye juu.