Psaumes 147.10
Bible en Swahili de l’est

¹ Haleluya. Msifuni Bwana; Maana ni vema kumwimbia Mungu wetu, Maana kwapendeza, kusifu ni kuzuri. ² Bwana ndiye aijengaye Yerusalemu, Huwakusanya waliotawanyika wa Israeli. ³ Huwaponya waliopondeka moyo, Na kuziganga jeraha zao. ⁴ Huihesabu idadi ya nyota, Huzipa zote majina. ⁵ Bwana wetu ni mkuu na mwingi wa nguvu, Akili zake hazina mpaka. ⁶ Bwana huwategemeza wenye upole, Huwaangusha chini wenye jeuri. ⁷ Mwimbieni Bwana kwa kushukuru, Mwimbieni Mungu wetu kwa kinubi. ⁸ Huzifunika mbingu kwa mawingu, Huitengenezea nchi mvua, Na kuyameesha majani milimani. ⁹ Humpa mnyama chakula chake, Wana-kunguru waliao. ¹⁰ Hapendezwi na nguvu za farasi, Wala hairidhii miguu ya mtu. ¹¹ Bwana huwaridhia wao wamchao, Na kuzitarajia fadhili zake. ¹² Msifu Bwana, Ee Yerusalemu; Msifu Mungu wako, Ee Sayuni. ¹³ Maana ameyakaza mapingo ya malango yako, Amewabariki wanao ndani yako. ¹⁴ Ndiye afanyaye amani mipakani mwako, Akushibishaye kwa unono wa ngano. ¹⁵ Huipeleka amri yake juu ya nchi, Neno lake lapiga mbio sana. ¹⁶ Ndiye atoaye theluji kama sufu, Huimwaga barafu yake kama majivu, ¹⁷ Hutupa mvua ya mawe kama makombo, Mbele ya baridi yake ni nani awezaye kusimama? ¹⁸ Hulituma neno lake na kuviyeyusha, Huuvumisha upepo wake, maji yakatiririka. ¹⁹ Humhubiri Yakobo neno lake, Na Israeli amri zake na hukumu zake. ²⁰ Hakulitendea taifa lo lote mambo kama hayo, Wala hukumu zake hawakuzijua. Haleluya.