Colossiens 3.23
Bible en Swahili de l’est

La vie nouvelle en Christ

¹ Basi mkiwa mmefufuliwa pamoja na Kristo, yatafuteni yaliyo juu Kristo aliko, ameketi mkono wa kuume wa Mungu.
² Yafikirini yaliyo juu, siyo yaliyo katika nchi.
³ Kwa maana mlikufa, na uhai wenu umefichwa pamoja na Kristo katika Mungu.
⁴ Kristo atakapofunuliwa, aliye uhai wetu, ndipo na ninyi mtafunuliwa pamoja naye katika utukufu.
⁵ Basi, vifisheni viungo vyenu vilivyo katika nchi, uasherati, uchafu, tamaa mbaya, mawazo mabaya, na kutamani, ndiyo ibada ya sanamu;
⁶ kwa ajili ya mambo hayo huja ghadhabu ya Mungu.
⁷ Katika hayo ninyi nanyi mlitembea zamani, mlipoishi katika hayo.
⁸ Lakini sasa yawekeni mbali nanyi haya yote, hasira, na ghadhabu, na uovu, na matukano, na matusi vinywani mwenu.

Les relations dans l’Église

⁹ Msiambiane uongo, kwa kuwa mmevua kabisa utu wa kale, pamoja na matendo yake;
¹⁰ mkivaa utu mpya, unaofanywa upya upate ufahamu sawasawa na mfano wake yeye aliyeuumba.
¹¹ Hapo hapana Myunani wala Myahudi, kutahiriwa wala kutokutahiriwa, mgeni wala mshenzi, mtumwa wala mwungwana, bali Kristo ni yote, na katika yote.
¹² Basi, kwa kuwa mmekuwa wateule wa Mungu, watakatifu wapendwao, jivikeni moyo wa rehema, utu wema, unyenyekevu, upole, uvumilivu,
¹³ mkichukuliana, na kusameheana, mtu akiwa na sababu ya kumlaumu mwenzake; kama Bwana alivyowasamehe ninyi, vivyo na ninyi.
¹⁴ Zaidi ya hayo yote jivikeni upendo, ndio kifungo cha ukamilifu.
¹⁵ Na amani ya Kristo iamue mioyoni mwenu; ndiyo mliyoitiwa katika mwili mmoja; tena iweni watu wa shukrani.
¹⁶ Neno la Kristo na likae kwa wingi ndani yenu katika hekima yote, mkifundishana na kuonyana kwa zaburi, na nyimbo, na tenzi za rohoni; huku mkimwimbia Mungu kwa neema mioyoni mwenu.
¹⁷ Na kila mfanyalo, kwa neno au kwa tendo, fanyeni yote katika jina la Bwana Yesu, mkimshukuru Mungu Baba kwa yeye.

Les relations à la maison

¹⁸ Ninyi wake, watiini waume zenu, kama ipendezavyo katika Bwana.
¹⁹ Ninyi waume, wapendeni wake zenu msiwe na uchungu nao.
²⁰ Ninyi watoto, watiini wazazi wenu katika mambo yote; maana jambo hili lapendeza katika Bwana.
²¹ Ninyi akina baba, msiwachokoze watoto wenu, wasije wakakata tamaa.
²² Ninyi watumwa, watiini hao ambao kwa mwili ni bwana zenu, katika mambo yote, si kwa utumwa wa macho, kama wajipendekezao kwa wanadamu, bali kwa unyofu wa moyo, mkimcha Bwana.
²³ Lo lote mfanyalo, lifanyeni kwa moyo, kama kwa Bwana, wala si kwa wanadamu,
²⁴ mkijua ya kuwa mtapokea kwa Bwana ujira wa urithi. Mnamtumikia Bwana Kristo.
²⁵ Maana adhulumuye atapata mapato ya udhalimu wake, wala hakuna upendeleo.