Proverbes 7.17
Vulgate

¹ fili mi custodi sermones meos et praecepta mea reconde tibi ² serva mandata mea et vives et legem meam quasi pupillam oculi tui ³ liga eam in digitis tuis scribe illam in tabulis cordis tui ⁴ dic sapientiae soror mea es et prudentiam voca amicam tuam ⁵ ut custodiat te a muliere extranea et ab aliena quae verba sua dulcia facit ⁶ de fenestra enim domus meae per cancellos prospexi ⁷ et video parvulos considero vecordem iuvenem ⁸ qui transit in platea iuxta angulum et propter viam domus illius graditur ⁹ in obscuro advesperascente die in noctis tenebris et caligine ¹⁰ et ecce mulier occurrit illi ornatu meretricio praeparata ad capiendas animas garrula et vaga ¹¹ quietis inpatiens nec valens in domo consistere pedibus suis ¹² nunc foris nunc in plateis nunc iuxta angulos insidians ¹³ adprehensumque deosculatur iuvenem et procaci vultu blanditur dicens ¹⁴ victimas pro salute debui hodie reddidi vota mea ¹⁵ idcirco egressa sum in occursum tuum desiderans te videre et repperi ¹⁶ intexui funibus lectum meum stravi tapetibus pictis ex Aegypto ¹⁷ aspersi cubile meum murra et aloe et cinnamomo ¹⁸ veni inebriemur uberibus donec inlucescat dies et fruamur cupitis amplexibus ¹⁹ non est enim vir in domo sua abiit via longissima ²⁰ sacculum pecuniae secum tulit in die plenae lunae reversurus est domum suam ²¹ inretivit eum multis sermonibus et blanditiis labiorum protraxit illum ²² statim eam sequitur quasi bos ductus ad victimam et quasi agnus lasciviens et ignorans quod ad vincula stultus trahatur ²³ donec transfigat sagitta iecur eius velut si avis festinet ad laqueum et nescit quia de periculo animae illius agitur ²⁴ nunc ergo fili audi me et adtende verba oris mei ²⁵ ne abstrahatur in viis illius mens tua neque decipiaris semitis eius ²⁶ multos enim vulneratos deiecit et fortissimi quique interfecti sunt ab ea ²⁷ viae inferi domus eius penetrantes interiora mortis