Psaumes 72.7
Bible en Swahili de l’est

La gloire d’un royaume juste

¹ Ee Mungu, mpe mfalme hukumu zako, Na mwana wa mfalme haki yako.
² Atawaamua watu wako kwa haki, Na watu wako walioonewa kwa hukumu.
³ Milima itawazalia watu amani, Na vilima navyo kwa haki.
⁴ Atawahukumu walioonewa wa watu, Atawaokoa wahitaji, atamseta mwenye kuonea.
⁵ Watakuogopa wakati wote wa kudumu jua, Na wakati wa kung’aa mwezi kizazi hata kizazi.
⁶ Atashuka kama mvua juu ya majani yaliyokatwa, Kama manyunyu yainyweshayo nchi.
⁷ Siku zake yeye, mtu mwenye haki atasitawi, Na wingi wa amani hata mwezi utakapokoma.
⁸ Na awe na enzi toka bahari hata bahari, Toka Mto hata miisho ya dunia.
⁹ Wakaao jangwani na wainame mbele zake; Adui zake na warambe mavumbi.
¹⁰ Wafalme wa Tarshishi na visiwa na walete kodi; Wafalme wa Sheba na Seba na watoe vipawa.
¹¹ Naam, wafalme wote na wamsujudie; Na mataifa yote wamtumikie.
¹² Kwa maana atamkomboa mhitaji aliapo, Na mtu aliyeonewa iwapo hana msaidizi.
¹³ Atamhurumia aliye dhaifu na maskini, Na nafsi za wahitaji ataziokoa.
¹⁴ Atawakomboa nafsi zao na kuonewa na udhalimu, Na damu yao ina thamani machoni pake.
¹⁵ Basi na aishi; Na wampe dhahabu ya Sheba; Na wamwombee daima; Na kumbariki mchana kutwa.
¹⁶ Na uwepo wingi wa nafaka Katika ardhi juu ya milima; Matunda yake na yawaye-waye kama Lebanoni, Na watu wa mjini wasitawi kama majani ya nchi.
¹⁷ Jina lake na lidumu milele, Pindi ling’aapo jua jina lake liwe na wazao; Mataifa yote na wajibariki katika yeye, Na kumwita heri.
¹⁸ Na ahimidiwe Bwana, Mungu, Mungu wa Israeli, Atendaye miujiza Yeye peke yake;
¹⁹ Jina lake tukufu na lihimidiwe milele; Dunia yote na ijae utukufu wake. Amina na Amina.
²⁰ Maombi ya Daudi mwana wa Yese yamekwisha.