Job 32.18
Bible en Swahili de l’est

¹ Basi hao watu watatu wakaacha kumjibu Ayubu, kwa sababu alikuwa mwenye haki machoni pake mwenyewe. ² Ndipo zikawaka hasira za huyo Elihu mwana wa Barakeli, Mbuzi, katika jamaa ya Ramu, juu ya Ayubu, kwa sababu alikuwa amejipa haki mwenyewe zaidi ya Mungu. ³ Tena hasira zake ziliwaka juu ya hao rafiki zake watatu kwa sababu hawakupata jawabu, lakini wamemhukumia Ayubu makosa. ⁴ Basi huyo Elihu alikuwa anangoja ili anene na Ayubu, kwa sababu hao wengine walikuwa wazee kuliko yeye. ⁵ Hata Elihu alipoona kuwa hapana jawabu katika vinywa vya watu hao watatu, hasira zake ziliwaka. ⁶ Basi Elihu mwana wa Barakeli, Mbuzi, akajibu, na kusema, Mimi ni kijana, na ninyi ni wazee sana; Kwa hiyo nilijizuia, nisithubutu kuwaonyesha nionavyo. ⁷ Nilisema, Yafaa siku ziseme, Na wingi wa miaka ufundishe hekima. ⁸ Lakini imo roho ndani ya mwanadamu, Na pumzi za Mwenyezi huwapa akili. ⁹ Sio wakuu walio wenye akili, Wala sio wazee watambuao hukumu. ¹⁰ Basi nilisema, Nisikilizeni mimi; Mimi nami nitawaonyesha nionavyo. ¹¹ Tazama, niliyangojea maneno yenu, Nilizisikiliza nisikie hoja zenu, Hapo mlipokitafuta mtakalonena. ¹² Naam, niliwasikiza ninyi, Na tazama, hapana mmoja aliyemshinda Ayubu, Wala kumjibu maneno yake, kati yenu. ¹³ Jitunzeni msiseme, Sisi tumepata hekima; Mungu yumkini akamshinda, si mtu; ¹⁴ Kwa kuwa yeye hajayaelekeza maneno yake kwangu; Wala sitamjibu mimi kwa maneno yenu. ¹⁵ Wameshangaa, hawajibu tena; Hawana neno la kusema. ¹⁶ Na mimi, je! Ningoje, kwa sababu hawaneni, Kwa sababu wasimama kimya, wala wasijibu tena; ¹⁷ Mimi nami nitajibu sehemu yangu, Mimi nami nitaonyesha nionavyo. ¹⁸ Kwa kuwa nimejaa maneno; Roho iliyo ndani yangu hunihimiza. ¹⁹ Tazama, tumbo langu ni kama divai iliyozibwa; Kama viriba vipya li karibu na kupasuka. ²⁰ Nitanena, ili nipate kutulia; Nitafunua midomo yangu na kujibu. ²¹ Tafadhali, nisiupendelee uso wa mtu; Wala sitajipendekeza kwa mtu ye yote. ²² Kwani mimi sijui kujipendekeza; Au Muumba wangu angeniondoa kwa upesi.