Psaumes 33.21
Bible en Swahili de l’est

La joie de ceux qui se confient en Dieu

¹ Mpigieni Bwana vigelegele, enyi wenye haki, Kusifu kunawapasa wanyofu wa moyo.
² Mshukuruni Bwana kwa kinubi, Kwa kinanda cha nyuzi kumi mwimbieni sifa.
³ Mwimbieni wimbo mpya, Pigeni kwa ustadi kwa sauti ya shangwe.
⁴ Kwa kuwa neno la Bwana lina adili, Na kazi yake yote huitenda kwa uaminifu.
⁵ Huzipenda haki na hukumu, Nchi imejaa fadhili za Bwana.
⁶ Kwa neno la Bwana mbingu zilifanyika, Na jeshi lake lote kwa pumzi ya kinywa chake.
⁷ Hukusanya maji ya bahari chungu chungu, Huviweka vilindi katika ghala.
⁸ Nchi yote na imwogope Bwana, Wote wakaao duniani na wamche.
⁹ Maana Yeye alisema, ikawa; Na Yeye aliamuru, ikasimama.
¹⁰ Bwana huyabatilisha mashauri ya mataifa, Huyatangua makusudi ya watu.
¹¹ Shauri la Bwana lasimama milele, Makusudi ya moyo wake vizazi na vizazi.
¹² Heri taifa ambalo Bwana ni Mungu wao, Watu aliowachagua kuwa urithi wake.
¹³ Toka mbinguni Bwana huchungulia, Huwatazama wanadamu wote pia.
¹⁴ Toka mahali pake aketipo Huwaangalia wote wakaao duniani.
¹⁵ yeye aiumbaye mioyo yao wote Huzifikiri kazi zao zote.
¹⁶ Hapana mfalme aokokaye kwa wingi wa uwezo, Wala shujaa haokoki kwa wingi wa nguvu.
¹⁷ Farasi hafai kitu kwa wokovu, Wala hamponyi mtu kwa wingi wa nguvu zake.
¹⁸ Tazama, jicho la Bwana li kwao wamchao, Wazingojeao fadhili zake.
¹⁹ Yeye huwaponya nafsi zao na mauti, Na kuwahuisha wakati wa njaa.
²⁰ Nafsi zetu zinamngoja Bwana; Yeye ndiye msaada wetu na ngao yetu.
²¹ Maana mioyo yetu itamfurahia, Kwa kuwa tumelitumainia jina lake takatifu.
²² Ee Bwana, fadhili zako zikae nasi, Kama vile tulivyokungoja Wewe.