Psaumes 80.7
Bible en Swahili de l’est

Plaidoyer pour la restauration d’Israël

¹ Wewe uchungaye Israeli, usikie, Wewe umwongozaye Yusufu kama kundi; Wewe uketiye juu ya makerubi, utoe nuru.
² Mbele ya Efraimu, na Benyamini, na Manase, Uziamshe nguvu zako, Uje, utuokoe.
³ Ee Mungu, uturudishe, Uangazishe uso wako nasi tutaokoka.
⁴ Ee Bwana, Mungu wa majeshi, hata lini Utayaghadhibikia maombi ya watu wako?
⁵ Umewalisha mkate wa machozi, Umewanywesha machozi kwa kipimo kikuu.
⁶ Unatufanya sababu ya ugomvi kwa jirani zetu, Na adui zetu wanacheka wao kwa wao.
⁷ Ee Mungu wa majeshi, uturudishe, Uangazishe uso wako nasi tutaokoka.
⁸ Ulileta mzabibu kutoka Misri, Ukawafukuza mataifa ukaupanda.
⁹ Ulitengeneza nafasi mbele yake, Nao ukatia mizizi sana ukaijaza nchi.
¹⁰ Milima ilifunikwa kwa uvuli wake, Matawi yake ni kama mierezi ya Mungu.
¹¹ Nao uliyaeneza matawi yake hata baharini, Na vichipukizi vyake hata kunako Mto.
¹² Kwa nini umezibomoa kuta zake, Wakauchuma wote wapitao njiani?
¹³ Nguruwe wa msituni wanauharibu, Na hayawani wa kondeni wanautafuna.
¹⁴ Ee Mungu wa majeshi, tunakusihi, urudi, Utazame toka juu uone, uujilie mzabibu huu.
¹⁵ Na mche ule ulioupanda Kwa mkono wako wa kuume; Na tawi lile ulilolifanya Kuwa imara kwa nafsi yako.
¹⁶ Umechomwa moto; umekatwa; Kwa lawama ya uso wako wanapotea.
¹⁷ Mkono wako na uwe juu yake Mtu wa mkono wako wa kuume; Juu ya mwanadamu uliyemfanya Kuwa imara kwa nafsi yako;
¹⁸ Basi hatutakuacha kwa kurudi nyuma; Utuhuishe nasi tutaliitia jina lako.
¹⁹ Ee Bwana, Mungu wa majeshi, uturudishe, Uangazishe uso wako nasi tutaokoka.