Proverbes 27.14
Bible en Swahili de l’est

¹ Usijisifu kwa ajili ya kesho; Kwa maana hujui yatakayozaliwa na siku moja.
² Mwingine na akusifu wala si kinywa chako mwenyewe; Mtu mgeni wala si midomo yako wewe.
³ Jiwe ni zito, na mchanga hulemea; Lakini ghadhabu ya mpumbavu ni nzito kuliko hivi vyote viwili.
⁴ Ghadhabu ni kali, na hasira ni gharika; Lakini ni nani awezaye kusimama mbele ya wivu.
⁵ Lawama ya wazi ni heri, Kuliko upendo uliositirika.
⁶ Jeraha utiwazo na rafiki ni amini; Bali kubusu kwa adui ni kwingi sana.
⁷ Nafsi iliyoshiba hukinai sega la asali; Bali nafsi yenye njaa huona kila kitu kichungu kuwa kitamu.
⁸ Kama ndege aendaye huko na huko mbali na kitundu chake; Ndivyo alivyo mtu aendaye huko na huko mbali na mahali pake.
⁹ Marhamu na manukato huufurahisha moyo; Kadhalika utamu wa rafiki ya mtu utokao katika kusudi la moyo wake.
¹⁰ Usimwache rafiki yako mwenyewe, wala rafiki ya baba yako, Wala usiende nyumbani mwa ndugu yako siku ya msiba wako. Afadhali jirani aliye karibu kuliko ndugu aliye mbali.
¹¹ Mwanangu, uwe na hekima na kunifurahisha moyo wangu; Ili nipate kumjibu anilaumuye.
¹² Mwenye busara huyaona mabaya na kujificha; Bali wajinga huendelea mbele wakaumia.
¹³ Twaa nguo yake amdhaminiye mgeni; Mtoza rehani aliye mdhamini wa malaya.
¹⁴ Mtu ambarikiye mwenzake kwa sauti kuu asubuhi na mapema; Itahesabiwa kuwa ni laana kwake.
¹⁵ Kutona-tona daima siku ya mvua nyingi, Na mwanamke mgomvi ni sawasawa;
¹⁶ Atakaye kumzuia huyo huuzuia upepo; Na mkono wake wa kuume hukuta mafuta.
¹⁷ Chuma hunoa chuma; Ndivyo mtu aunoavyo uso wa rafiki yake.
¹⁸ Yeye autunzaye mtini atakula matunda yake; Naye amhudumiaye bwana wake ataheshimiwa.
¹⁹ Kama uso ufananavyo na uso katika maji; Kadhalika moyo wa mtu na mwenzake.
²⁰ Kuzimu na Uharibifu havishibi; Wala macho ya wanadamu hayashibi.
²¹ Kalibu ni kwa fedha, na tanuru kwa dhahabu; Na mtu hujaribiwa kwa sifa zake.
²² Hata ukimtwanga mpumbavu kwa mchi kinuni pamoja na ngano; Upumbavu wake hautamtoka.
²³ Fanya bidii kuijua hali ya makundi yako; Na kuwaangalia sana ng’ombe zako.
²⁴ Kwa maana mali haziwi za milele; Na taji je! Yadumu tangu kizazi hata kizazi?
²⁵ Manyasi huchukuliwa, na majani mabichi huonekana, Na maboga ya milimani hukusanyika.
²⁶ Wana-kondoo hufaa kwa mavazi yako; Na mbuzi ni thamani ya shamba
²⁷ Tena yatakuwapo maziwa ya mbuzi, Ya kukutosha kwa chakula chako, Na chakula cha watu wa nyumbani mwako, Na posho la vijakazi vyako.