Lévitique 6.22
Vulgate

Instructions aux prêtres sur les sacrifices

¹ locutus est Dominus ad Mosen dicens
² praecipe Aaron et filiis eius haec est lex holocausti cremabitur in altari tota nocte usque mane ignis ex eodem altari erit
³ vestietur sacerdos tunica et feminalibus lineis tolletque cineres quos vorans ignis exusit et ponens iuxta altare
⁴ spoliabitur prioribus vestimentis indutusque aliis efferet eos extra castra et in loco mundissimo usque ad favillam consumi faciet
⁵ ignis autem in altari semper ardebit quem nutriet sacerdos subiciens ligna mane per singulos dies et inposito holocausto desuper adolebit adipes pacificorum
⁶ ignis est iste perpetuus qui numquam deficiet in altari
⁷ haec est lex sacrificii et libamentorum quae offerent filii Aaron coram Domino et coram altari
⁸ tollet sacerdos pugillum similae quae conspersa est oleo et totum tus quod super similam positum est adolebitque illud in altari in monumentum odoris suavissimi Domino
⁹ reliquam autem partem similae comedet Aaron cum filiis suis absque fermento et comedet in loco sancto atrii tabernaculi
¹⁰ ideo autem non fermentabitur quia pars eius in Domini offertur incensum sanctum sanctorum erit sicut pro peccato atque delicto
¹¹ mares tantum stirpis Aaron comedent illud legitimum ac sempiternum est in generationibus vestris de sacrificiis Domini omnis qui tetigerit illa sanctificabitur
¹² et locutus est Dominus ad Mosen dicens
¹³ haec est oblatio Aaron et filiorum eius quam offerre debent Domino in die unctionis suae decimam partem oephi offerent similae in sacrificio sempiterno medium eius mane et medium vespere
¹⁴ quae in sartagine oleo conspersa frigetur offeret autem eam calidam in odorem suavissimum Domino
¹⁵ sacerdos qui patri iure successerit et tota cremabitur in altari
¹⁶ omne enim sacrificium sacerdotum igne consumetur nec quisquam comedet ex eo
¹⁷ Locutus est autem Dominus ad Moysen dicens
¹⁸ Loquere Aaron et filiis ejus Ista est lex hostiae pro peccato in loco ubi offertur holocaustum immolabitur coram Domino. Sanctum sanctorum est
¹⁹ Sacerdos qui offert comedet eam in loco sancto, in atrio tabernaculi
²⁰ Quidquid tetigerit carnes ejus, sanctificabitur Si de sanguine illius vestis fuerit aspersa lavabitur in loco sancto
²¹ Vas autem fictile in quo cocta est confringetur quod si vas aeneum fuerit defricabitur et lavabitur aqua
²² Omnis masculus de genere sacerdotali vescetur de carnibus ejus, quia Sanctum sanctorum est
²³ Hostia enim quae caeditur pro peccato cujus sanguis infertur in tabernaculum testimonii ad expiandum in sanctuario non comedetur sed comburetur igni