Psaumes 118.21
Bible en Swahili de l’est

Louange à Dieu pour sa bonté

¹ Haleluya. Mshukuruni Bwana kwa kuwa ni mwema, Kwa maana fadhili zake ni za milele.
² Israeli na aseme sasa, Ya kwamba fadhili zake ni za milele.
³ Mlango wa Haruni na waseme sasa, Ya kwamba fadhili zake ni za milele.
⁴ Wamchao Bwana na waseme sasa, Ya kwamba fadhili zake ni za milele.
⁵ Katika shida yangu nalimwita Bwana; Bwana akanijibu akaniweka panapo nafasi.
⁶ Bwana yuko upande wangu, sitaogopa; Mwanadamu atanitenda nini?
⁷ Bwana yuko upande wangu, msaidizi wangu, Kwa hiyo nitawaona wanaonichukia wameshindwa.
⁸ Ni heri kumkimbilia Bwana Kuliko kuwatumainia wanadamu.
⁹ Ni heri kumkimbilia Bwana. Kuliko kuwatumainia wakuu.
¹⁰ Mataifa yote walinizunguka; Kwa jina la Bwana naliwakatilia mbali.
¹¹ Walinizunguka, naam, walinizunguka; Kwa jina la Bwana naliwakatilia mbali.
¹² Walinizunguka kama nyuki, Walizimika kama moto wa miibani; Kwa jina la Bwana naliwakatilia mbali.
¹³ Ulinisukuma sana ili nianguke; Lakini Bwana akanisaidia.
¹⁴ Bwana ni nguvu zangu na wimbo wangu, Naye amekuwa wokovu wangu.
¹⁵ Sauti ya furaha na wokovu Imo hemani mwao wenye haki; Mkono wa kuume wa Bwana hutenda makuu.
¹⁶ Mkono wa kuume wa Bwana umetukuzwa; Mkono wa kuume wa Bwana hutenda makuu.
¹⁷ Sitakufa bali nitaishi, Nami nitayasimulia matendo ya Bwana.
¹⁸ Bwana ameniadhibu sana, Lakini hakuniacha nife.
¹⁹ Nifungulieni malango ya haki, Nitaingia na kumshukuru Bwana.
²⁰ Lango hili ni la Bwana, Wenye haki ndio watakaoliingia.
²¹ Nitakushukuru kwa maana umenijibu, Nawe umekuwa wokovu wangu.
²² Jiwe walilolikataa waashi Limekuwa jiwe kuu la pembeni.
²³ Neno hili limetoka kwa Bwana, Nalo ni ajabu machoni petu.
²⁴ Siku hii ndiyo aliyoifanya Bwana, Tutashangilia na kuifurahia.
²⁵ Ee Bwana, utuokoe, twakusihi; Ee Bwana, utufanikishe, twakusihi.
²⁶ Na abarikiwe yeye ajaye kwa jina la Bwana; Tumewabarikia toka nyumbani mwa Bwana.
²⁷ Bwana ndiye aliye Mungu, Naye ndiye aliyetupa nuru. Ifungeni dhabihu kwa kamba Pembeni mwa madhabahu.
²⁸ Ndiwe Mungu wangu, nami nitakushukuru, Ndiwe Mungu wangu, nami nitakutukuza.
²⁹ Mshukuruni Bwana kwa kuwa ni mwema, Kwa maana fadhili zake ni za milele.