Romains 15
Vulgate

¹ debemus autem nos firmiores inbecillitates infirmorum sustinere et non nobis placere ² unusquisque vestrum proximo suo placeat in bonum ad aedificationem ³ etenim Christus non sibi placuit sed sicut scriptum est inproperia inproperantium tibi ceciderunt super me ⁴ quaecumque enim scripta sunt ad nostram doctrinam scripta sunt ut per patientiam et consolationem scripturarum spem habeamus ⁵ Deus autem patientiae et solacii det vobis id ipsum sapere in alterutrum secundum Iesum Christum ⁶ ut unianimes uno ore honorificetis Deum et Patrem Domini nostri Iesu Christi ⁷ propter quod suscipite invicem sicut et Christus suscepit vos in honorem Dei ⁸ dico enim Christum Iesum ministrum fuisse circumcisionis propter veritatem Dei ad confirmandas promissiones patrum ⁹ gentes autem super misericordiam honorare Deum sicut scriptum est propter hoc confitebor tibi in gentibus et nomini tuo cantabo ¹⁰ et iterum dicit laetamini gentes cum plebe eius ¹¹ et iterum laudate omnes gentes Dominum et magnificate eum omnes populi ¹² et rursus Esaias ait erit radix Iesse et qui exsurget regere gentes in eo gentes sperabunt ¹³ Deus autem spei repleat vos omni gaudio et pace in credendo ut abundetis in spe in virtute Spiritus Sancti ¹⁴ certus sum autem fratres mei et ego ipse de vobis quoniam et ipsi pleni estis dilectione repleti omni scientia ita ut possitis alterutrum monere ¹⁵ audacius autem scripsi vobis fratres ex parte tamquam in memoriam vos reducens propter gratiam quae data est mihi a Deo ¹⁶ ut sim minister Christi Iesu in gentibus sanctificans evangelium Dei ut fiat oblatio gentium accepta sanctificata in Spiritu Sancto ¹⁷ habeo igitur gloriam in Christo Iesu ad Deum ¹⁸ non enim audeo aliquid loqui eorum quae per me non effecit Christus in oboedientiam gentium verbo et factis ¹⁹ in virtute signorum et prodigiorum in virtute Spiritus Sancti ita ut ab Hierusalem per circuitum usque in Illyricum repleverim evangelium Christi ²⁰ sic autem hoc praedicavi evangelium non ubi nominatus est Christus ne super alienum fundamentum aedificarem ²¹ sed sicut scriptum est quibus non est adnuntiatum de eo videbunt et qui non audierunt intellegent ²² propter quod et inpediebar plurimum venire ad vos ²³ nunc vero ulterius locum non habens in his regionibus cupiditatem autem habens veniendi ad vos ex multis iam annis ²⁴ cum in Hispaniam proficisci coepero spero quod praeteriens videam vos et a vobis deducar illuc si vobis primum ex parte fruitus fuero ²⁵ nunc igitur proficiscar in Hierusalem ministrare sanctis ²⁶ probaverunt enim Macedonia et Achaia conlationem aliquam facere in pauperes sanctorum qui sunt in Hierusalem ²⁷ placuit enim eis et debitores sunt eorum nam si spiritalium eorum participes facti sunt gentiles debent et in carnalibus ministrare eis ²⁸ hoc igitur cum consummavero et adsignavero eis fructum hunc proficiscar per vos in Hispaniam ²⁹ scio autem quoniam veniens ad vos in abundantia benedictionis Christi veniam ³⁰ obsecro igitur vos fratres per Dominum nostrum Iesum Christum et per caritatem Spiritus ut adiuvetis me in orationibus pro me ad Deum ³¹ ut liberer ab infidelibus qui sunt in Iudaea et obsequii mei oblatio accepta fiat in Hierosolyma sanctis ³² ut veniam ad vos in gaudio per voluntatem Dei et refrigerer vobiscum ³³ Deus autem pacis sit cum omnibus vobis amen