Psaumes 102.28
Bible en Swahili de l’est

Prière dans la détresse

¹ Ee Bwana, usikie kuomba kwangu, Kilio changu kikufikie.
² Usinifiche uso wako siku ya shida yangu, Unitegee sikio lako, siku niitapo unijibu upesi.
³ Maana siku zangu zinatoweka kama moshi, Na mifupa yangu inateketea kama kinga.
⁴ Moyo wangu umepigwa kama majani na kukauka, Naam, ninasahau kula chakula changu.
⁵ Kwa ajili ya sauti ya kuugua kwangu Mifupa yangu imegandamana na nyama yangu.
⁶ Nimekuwa kama mwari nyuni wa jangwani, Na kufanana na bundi wa mahameni.
⁷ Nakesha, tena nimekuwa kama shomoro Aliye peke yake juu ya nyumba.
⁸ Adui zangu wananilaumu mchana kutwa; Wanaonichukia kana kwamba wana wazimu Huapa kwa kunitaja mimi.
⁹ Maana nimekula majivu kama chakula, Na kukichanganya kinywaji changu na machozi.
¹⁰ Kwa sababu ya ghadhabu yako na hasira yako; Maana umeniinua na kunitupilia mbali.
¹¹ Siku zangu zi kama kivuli kilichotandaa, Nami ninanyauka kama majani.
¹² Bali Wewe, Bwana utaketi ukimiliki milele, Na kumbukumbu lako kizazi hata kizazi.
¹³ Wewe mwenyewe utasimama, Na kuirehemu Sayuni, Kwa maana ndio wakati wa kuihurumia, Naam, majira yaliyoamriwa yamewadia.
¹⁴ Maana watumishi wako wameyaridhia mawe yake, Na kuyaonea huruma mavumbi yake.
¹⁵ Kisha mataifa wataliogopa jina la Bwana, Na wafalme wote wa dunia utukufu wako;
¹⁶ Bwana atakapokuwa ameijenga Sayuni, Atakapoonekana katika utukufu wake,
¹⁷ Atakapoyaelekea maombi yake aliye mkiwa, Asiyadharau maombi yao.
¹⁸ Kizazi kitakachokuja kitaandikiwa hayo, Na watu watakaoumbwa watamsifu Bwana.
¹⁹ Maana ametazama toka patakatifu pake pa juu, Toka mbinguni Bwana ameiangalia nchi,
²⁰ Ili akusikie kuugua kwake aliyefungwa, Na kuwafungua walioandikiwa kufa.
²¹ Watu walitangaze jina la Bwana katika Sayuni, Na sifa zake katika Yerusalemu,
²² Pindi mataifa watapokusanyika pamoja, Falme nazo ili kumtumikia Bwana.
²³ Amezipunguza nguvu zangu njiani; Amezifupisha siku zangu.
²⁴ Nitasema, Ee Mungu wangu, usiniondoe katikati ya siku zangu; Miaka yako ni tangu kizazi hata kizazi.
²⁵ Hapo mwanzo uliutia msingi wa nchi, Na mbingu ni kazi ya mikono yako.
²⁶ Hizi zitaharibika, bali Wewe utadumu Naam, hizi zitachakaa kama nguo; Na kama mavazi utazibadilisha, Nazo zitabadilika.
²⁷ Lakini Wewe U Yeye yule; Na miaka yako haitakoma.
²⁸ Wana wa watumishi wako watakaa, Na wazao wao wataimarishwa mbele zako.