Psaumes 34.3
Bible en Swahili de l’est

Le salut de l’Éternel pour le juste

¹ Nitamhimidi Bwana kila wakati, Sifa zake zi kinywani mwangu daima.
² Katika Bwana nafsi yangu itajisifu, Wanyenyekevu wasikie wakafurahi.
³ Mtukuzeni Bwana pamoja nami, Na tuliadhimishe jina lake pamoja.
⁴ Nalimtafuta Bwana akanijibu, Akaniponya na hofu zangu zote.
⁵ Wakamwelekea macho wakatiwa nuru, Wala nyuso zao hazitaona haya.
⁶ Maskini huyu aliita, Bwana akasikia, Akamwokoa na taabu zake zote.
⁷ Malaika wa Bwana hufanya kituo, Akiwazungukia wamchao na kuwaokoa.
⁸ Onjeni mwone ya kuwa Bwana yu mwema; Heri mtu yule anayemtumaini.
⁹ Mcheni Bwana, enyi watakatifu wake, Yaani, wamchao hawahitaji kitu.
¹⁰ Wana-simba hutindikiwa, huona njaa; Bali wamtafutao Bwana hawatahitaji kitu cho chote kilicho chema.
¹¹ Njoni, enyi wana, mnisikilize, Nami nitawafundisha kumcha Bwana.
¹² Ni nani mtu yule apendezwaye na uzima, Apendaye siku nyingi apate kuona mema?
¹³ Uuzuie ulimi wako na mabaya, Na midomo yako na kusema hila.
¹⁴ Uache mabaya ukatende mema, Utafute amani ukaifuatie.
¹⁵ Macho ya Bwana huwaelekea wenye haki, Na masikio yake hukielekea kilio chao.
¹⁶ Uso wa Bwana ni juu ya watenda mabaya, Aliondoe kumbukumbu lao duniani.
¹⁷ Walilia, naye Bwana akasikia, Akawaponya na taabu zao zote.
¹⁸ Bwana yu karibu nao waliovunjika moyo, Na waliopondeka roho huwaokoa.
¹⁹ Mateso ya mwenye haki ni mengi, Lakini Bwana humponya nayo yote.
²⁰ Huihifadhi mifupa yake yote, Haukuvunjika hata mmoja.
²¹ Uovu utamwua asiye haki, Nao wamchukiao mwenye haki watahukumiwa.
²² Bwana huzikomboa nafsi za watumishi wake, Wala hawatahukumiwa wote wamkimbiliao.