Job 8.15
Bible en Swahili de l’est

Intervention n° 1 de Bildad

¹ Ndipo Bildadi huyo Mshuhi akajibu, na kusema,
² Wewe utanena maneno haya hata lini? Maneno ya kinywa chako yatakuwa kama upepo mkuu hata lini?
³ Je! Mungu hupotosha hukumu? Au, huyo Mwenyezi hupotosha yaliyo ya haki?
⁴ Kwamba watoto wako wamemfanyia dhambi, Naye amewatia mkononi mwa kosa lao;
⁵ Wewe ukimtafuta Mungu kwa bidii, Na kumsihi huyo Mwenyezi;
⁶ Ukiwa wewe u safi na mwelekevu; Hakika yeye sasa angeamka kwa ajili yako, Na kuyafanya makazi ya haki yako kufanikiwa.
⁷ Tena ujapokuwa huo mwanzo wako ulikuwa ni mdogo, Lakini mwisho wako ungeongezeka sana.
⁸ Basi, uwaulize, tafadhali, vizazi vya zamani, Ujitie kuyaangalia yale baba zao waliyoyatafuta;
⁹ (Kwani sisi tu wa jana tu, wala hatujui neno, Kwa kuwa siku zetu duniani ni kivuli tu;)
¹⁰ Je! Hawatakufunza wao, na kukueleza, Na kutamka maneno yatokayo mioyoni mwao?
¹¹ Je! Hayo mafunjo yamea pasipo matope Na makangaga kumea pasipo maji?
¹² Yakiwa yakali mabichi bado, wala hayakukatwa, Hunyauka mbele ya majani mengine.
¹³ Ndivyo ulivyo mwisho wa hao wamsahauo Mungu; Na matumaini yake huyo mbaya huangamia;
¹⁴ Uthabiti wake utavunjika, Na matumaini yake huwa ni nyuzi za buibui.
¹⁵ Ataitegemea nyumba yake, isisimame; Atashikamana nayo, isidumu.
¹⁶ Yeye huwa mti mbichi mbele ya jua, Nayo machipukizi yake huenea katika bustani yake.
¹⁷ Mizizi yake huzonga-zonga chuguu, Huangalia mahali penye mawe.
¹⁸ Lakini, aking’olewa mahali pake, Ndipo patamkana, na kusema, Mimi sikukuona.
¹⁹ Tazama, furaha ya njia yake ni hii, Na wengine watachipuka kutoka katika nchi.
²⁰ Tazama, Mungu hatamtupa mtu mkamilifu, Wala hatawathibitisha watendao uovu.
²¹ Bado atakijaza kinywa chako kicheko, Na midomo yako ataijaza shangwe.
²² Hao wakuchukiao watavikwa aibu; Nayo hema yake mwovu haitakuwako tena.