Psaumes 109.9
Bible en Swahili de l’est

Imprécation contre le méchant

¹ Ee Mungu wa sifa zangu, usinyamaze,
² Kwa maana wamenifumbulia kinywa; Kinywa cha mtu asiye haki, cha hila, Wamesema nami kwa ulimi wa uongo.
³ Naam, kwa maneno ya chuki wamenizunguka, Wamepigana nami bure.
⁴ Badala ya upendo wangu wao hunishitaki, Ijapokuwa naliwaombea.
⁵ Wamenichukuza mabaya badala ya mema, Na chuki badala ya upendo wangu.
⁶ Uweke mtu mkorofi juu yake, Mshitaki asimame mkono wake wa kuume.
⁷ Katika kuhukumiwa ataonekana hana haki, Na sala yake itadhaniwa kuwa ni dhambi.
⁸ Siku zake na ziwe chache, Usimamizi wake na atwae mtu mwingine.
⁹ Wanawe na wawe yatima, Na mkewe na awe mjane.
¹⁰ Kutanga na watange wanawe na kuomba, Watafute chakula mbali na mahame yao.
¹¹ Mdai na anase vitu vyote alivyo navyo, Wageni na wateke mapato ya kazi yake.
¹² Asiwe na mtu wa kumfanyia fadhili, Wala mtu wa kuwahurumia yatima wake.
¹³ Wazao wake waangamizwe, Jina lao likafutwe katika kizazi cha pili.
¹⁴ Uovu wa baba zake ukumbukwe mbele za Bwana, Na dhambi ya mamaye isifutwe.
¹⁵ Ziwe mbele za Bwana daima, Aliondoe kumbukumbu lao duniani.
¹⁶ Kwa kuwa hakukumbuka kutenda fadhili, Bali alimfukuza mnyonge na mhitaji, Hata akamfisha mtu aliyevunjika moyo,
¹⁷ Naye alipenda kulaani, nako kukampata. Hakupendezwa na kubariki, kukawa mbali naye,
¹⁸ Alijivika laana kana kwamba ni vazi lake. Ikamwingilia moyoni kama maji, Na kama mafuta mifupani mwake.
¹⁹ Na iwe kwake kama vazi ajivikalo, Na kama mshipi ajifungao daima.
²⁰ Ndiyo malipo ya washitaki wangu toka kwa Bwana, Na ya hao wanaoisingizia nafsi yangu mabaya.
²¹ Na Wewe, MUNGU, Bwana, unitendee kwa ajili ya jina lako, Kwa kuwa fadhili zako ni njema uniokoe.
²² Kwa maana mimi ni mnyonge na mhitaji, Na moyo wangu umejeruhi ndani yangu.
²³ Ninapita kama kivuli kianzacho kutoweka, Ninapeperushwa kama nzige.
²⁴ Magoti yangu yamedhoofu kwa kufunga, Na mwili wangu umekonda kwa kukosa mafuta.
²⁵ Nami nalikuwa laumu kwao, Wanionapo hutikisa vichwa vyao.
²⁶ Ee Bwana, Mungu wangu, unisaidie, Uniokoe sawasawa na fadhili zako.
²⁷ Nao wakajue ya kuwa ndio mkono wako; Wewe, Bwana, umeyafanya hayo.
²⁸ Wao walaani, bali Wewe utabariki, Wameondoka wao wakaaibishwa, Bali mtumishi wako atafurahi.
²⁹ Washitaki wangu watavikwa fedheha, Watajivika aibu yao kama joho.
³⁰ Nitamshukuru Bwana kwa kinywa changu, Naam, nitamsifu katikati ya mkutano.
³¹ Maana atasimama mkono wa kuume wa mhitaji Amwokoe na wanaoihukumu nafsi yake.