Psaumes 139.7
Bible en Swahili de l’est

¹ Ee Bwana, umenichunguza na kunijua. ² Wewe wajua kuketi kwangu na kuondoka kwangu; Umelifahamu wazo langu tokea mbali. ³ Umepepeta kwenda kwangu na kulala kwangu, Umeelewa na njia zangu zote. ⁴ Maana hamna neno ulimini mwangu Usilolijua kabisa, Bwana. ⁵ Umenizingira nyuma na mbele, Ukaniwekea mkono wako. ⁶ Maarifa hayo ni ya ajabu, yanishinda mimi, Hayadirikiki, siwezi kuyafikia. ⁷ Niende wapi nijiepushe na roho yako? Niende wapi niukimbie uso wako? ⁸ Kama ningepanda mbinguni, Wewe uko; Ningefanya kuzimu kitanda changu, Wewe uko. ⁹ Ningezitwaa mbawa za asubuhi, Na kukaa pande za mwisho za bahari; ¹⁰ Huko nako mkono wako utaniongoza, Na mkono wako wa kuume utanishika. ¹¹ Kama nikisema, Hakika giza litanifunika, Na nuru inizungukayo ingekuwa usiku; ¹² Giza nalo halikufichi kitu, Bali usiku huangaza kama mchana; Giza na mwanga kwako ni sawasawa. ¹³ Maana Wewe ndiwe uliyeniumba mtima wangu, Uliniunga tumboni mwa mama yangu. ¹⁴ Nitakushukuru kwa kuwa nimeumbwa Kwa jinsi ya ajabu ya kutisha. Matendo yako ni ya ajabu, Na nafsi yangu yajua sana, ¹⁵ Mifupa yangu haikusitirika kwako, Nilipoumbwa kwa siri, Nilipoungwa kwa ustadi pande za chini za nchi; ¹⁶ Macho yako yaliniona kabla sijakamilika; Chuoni mwako ziliandikwa zote pia, Siku zilizoamriwa kabla hazijawa bado. ¹⁷ Mungu, fikira zako zina thamani nyingi kwangu; Jinsi ilivyo kubwa jumla yake! ¹⁸ Kama ningezihesabu ni nyingi kuliko mchanga; Niamkapo nikali pamoja nawe. ¹⁹ Ee Mungu, laiti ungewafisha waovu! Enyi watu wa damu, ondokeni kwangu; ²⁰ Kwa maana wakuasi kwa ubaya, Adui zako wakutaja jina lako bure. ²¹ Je! Bwana nisiwachukie wanaokuchukia? Nisikirihike nao wakuasio? ²² Nawachukia kwa ukomo wa chuki, Wamekuwa adui kwangu. ²³ Ee Mungu, unichunguze, uujue moyo wangu, Unijaribu, uyajue mawazo yangu; ²⁴ Uone kama iko njia iletayo majuto ndani yangu, Ukaniongoze katika njia ya milele.