Galates 1.13
Vulgate

Salutation et reproche

¹ Paulus apostolus non ab hominibus neque per hominem sed per Iesum Christum et Deum Patrem qui suscitavit eum a mortuis
² et qui mecum sunt omnes fratres ecclesiis Galatiae
³ gratia vobis et pax a Deo Patre et Domino nostro Iesu Christo
⁴ qui dedit semet ipsum pro peccatis nostris ut eriperet nos de praesenti saeculo nequam secundum voluntatem Dei et Patris nostri
⁵ cui est gloria in saecula saeculorum amen
⁶ miror quod sic tam cito transferimini ab eo qui vos vocavit in gratiam Christi in aliud evangelium
⁷ quod non est aliud nisi sunt aliqui qui vos conturbant et volunt convertere evangelium Christi
⁸ sed licet nos aut angelus de caelo evangelizet vobis praeterquam quod evangelizavimus vobis anathema sit
⁹ sicut praediximus et nunc iterum dico si quis vobis evangelizaverit praeter id quod accepistis anathema sit
¹⁰ modo enim hominibus suadeo aut Deo aut quaero hominibus placere si adhuc hominibus placerem Christi servus non essem

Paul et les autres apôtres : un même Évangile

¹¹ notum enim vobis facio fratres evangelium quod evangelizatum est a me quia non est secundum hominem
¹² neque enim ego ab homine accepi illud neque didici sed per revelationem Iesu Christi
¹³ audistis enim conversationem meam aliquando in iudaismo quoniam supra modum persequebar ecclesiam Dei et expugnabam illam
¹⁴ et proficiebam in iudaismo supra multos coetaneos in genere meo abundantius aemulator existens paternarum mearum traditionum
¹⁵ cum autem placuit ei qui me segregavit de utero matris meae et vocavit per gratiam suam
¹⁶ ut revelaret Filium suum in me ut evangelizarem illum in gentibus continuo non adquievi carni et sanguini
¹⁷ neque veni Hierosolyma ad antecessores meos apostolos sed abii in Arabiam et iterum reversus sum Damascum
¹⁸ deinde post annos tres veni Hierosolyma videre Petrum et mansi apud eum diebus quindecim
¹⁹ alium autem apostolorum vidi neminem nisi Iacobum fratrem Domini
²⁰ quae autem scribo vobis ecce coram Deo quia non mentior
²¹ deinde veni in partes Syriae et Ciliciae
²² eram autem ignotus facie ecclesiis Iudaeae quae erant in Christo
²³ tantum autem auditum habebant quoniam qui persequebatur nos aliquando nunc evangelizat fidem quam aliquando expugnabat
²⁴ et in me clarificabant Deum