Jacques 1.13
Vulgate

¹ Iacobus Dei et Domini nostri Iesu Christi servus duodecim tribubus quae sunt in dispersione salutem ² omne gaudium existimate fratres mei cum in temptationibus variis incideritis ³ scientes quod probatio fidei vestrae patientiam operatur ⁴ patientia autem opus perfectum habeat ut sitis perfecti et integri in nullo deficientes ⁵ si quis autem vestrum indiget sapientiam postulet a Deo qui dat omnibus affluenter et non inproperat et dabitur ei ⁶ postulet autem in fide nihil haesitans qui enim haesitat similis est fluctui maris qui a vento movetur et circumfertur ⁷ non ergo aestimet homo ille quod accipiat aliquid a Domino ⁸ vir duplex animo inconstans in omnibus viis suis ⁹ glorietur autem frater humilis in exaltatione sua ¹⁰ dives autem in humilitate sua quoniam sicut flos faeni transibit ¹¹ exortus est enim sol cum ardore et arefecit faenum et flos eius decidit et decor vultus eius deperiit ita et dives in itineribus suis marcescet ¹² beatus vir qui suffert temptationem quia cum probatus fuerit accipiet coronam vitae quam repromisit Deus diligentibus se ¹³ nemo cum temptatur dicat quoniam a Deo temptor Deus enim intemptator malorum est ipse autem neminem temptat ¹⁴ unusquisque vero temptatur a concupiscentia sua abstractus et inlectus ¹⁵ dein concupiscentia cum conceperit parit peccatum peccatum vero cum consummatum fuerit generat mortem ¹⁶ nolite itaque errare fratres mei dilectissimi ¹⁷ omne datum optimum et omne donum perfectum desursum est descendens a Patre luminum apud quem non est transmutatio nec vicissitudinis obumbratio ¹⁸ voluntarie genuit nos verbo veritatis ut simus initium aliquod creaturae eius ¹⁹ scitis fratres mei dilecti sit autem omnis homo velox ad audiendum tardus autem ad loquendum et tardus ad iram ²⁰ ira enim viri iustitiam Dei non operatur ²¹ propter quod abicientes omnem inmunditiam et abundantiam malitiae in mansuetudine suscipite insitum verbum quod potest salvare animas vestras ²² estote autem factores verbi et non auditores tantum fallentes vosmet ipsos ²³ quia si quis auditor est verbi et non factor hic conparabitur viro consideranti vultum nativitatis suae in speculo ²⁴ consideravit enim se et abiit et statim oblitus est qualis fuerit ²⁵ qui autem perspexerit in lege perfecta libertatis et permanserit non auditor obliviosus factus sed factor operis hic beatus in facto suo erit ²⁶ si quis autem putat se religiosum esse non refrenans linguam suam sed seducens cor suum huius vana est religio ²⁷ religio munda et inmaculata apud Deum et Patrem haec est visitare pupillos et viduas in tribulatione eorum inmaculatum se custodire ab hoc saeculo