Psaumes 31.24
Bible en Swahili de l’est

Prière confiante dans l’épreuve

¹ Nimekukimbilia Wewe, Bwana, Nisiaibike milele. Kwa haki yako uniponye,
² Unitegee sikio lako, uniokoe hima. Uwe kwangu mwamba wa nguvu, Nyumba yenye maboma ya kuniokoa.
³ Ndiwe genge langu na ngome yangu; Kwa ajili ya jina lako uniongoze, unichunge.
⁴ Utanitoa katika wavu walionitegea kwa siri, Maana Wewe ndiwe ngome yangu.
⁵ Mikononi mwako naiweka roho yangu; Umenikomboa, Ee Bwana, Mungu wa kweli.
⁶ Nawachukia wao washikao yasiyofaa yenye uongo; Bali mimi namtumaini Bwana.
⁷ Na nishangilie, nizifurahie fadhili zako, Kwa kuwa umeyaona mateso yangu. Umeijua nafsi yangu taabuni,
⁸ Wala hukunitia mikononi mwa adui; Miguu yangu umeisimamisha panapo nafasi.
⁹ Ee Bwana, unifadhili, maana ni katika dhiki, Jicho langu limenyauka kwa masumbufu, Naam, mwili wangu na nafsi yangu.
¹⁰ Maana maisha yangu yamekoma kwa huzuni, Na miaka yangu kwa kuugua. Nguvu zangu zinatetemeka kwa uovu wangu, Na mifupa yangu imekauka.
¹¹ Kwa sababu ya watesi wangu nimekuwa laumu, Naam, hasa kwa jirani zangu; Na kitu cha kutisha kwa rafiki zangu; Walioniona njiani walinikimbia.
¹² Nimesahauliwa kama mfu asiyekumbukwa; Nimekuwa kama chombo kilichovunjika.
¹³ Maana nimesikia masingizio ya wengi; Hofu ziko pande zote. Waliposhauriana juu yangu, Walifanya hila wauondoe uhai wangu.
¹⁴ Lakini mimi nakutumaini Wewe, Bwana, Nimesema, Wewe ndiwe Mungu wangu.
¹⁵ Nyakati zangu zimo mikononi mwako; Uniponye na adui zangu, nao wanaonifuatia.
¹⁶ Umwangaze mtumishi wako Kwa nuru ya uso wako; Uniokoe kwa ajili ya fadhili zako.
¹⁷ Ee Bwana, nisiaibishwe, maana nimekuita; Waaibishwe wasio haki, wanyamaze kuzimuni.
¹⁸ Midomo ya uongo iwe na ububu, Imneneayo mwenye haki maneno ya kiburi, Kwa majivuno na dharau.
¹⁹ Jinsi zilivyo nyingi fadhili zako Ulizowawekea wakuchao; Ulizowatendea wakukimbiliao Mbele ya wanadamu!
²⁰ Utawasitiri na fitina za watu Katika sitara ya kuwapo kwako; Utawaficha katika hema Na mashindano ya ndimi.
²¹ Bwana ahimidiwe; kwa maana amenitendea Fadhili za ajabu katika mji wenye boma.
²² Nami nalisema kwa haraka yangu, Nimekatiliwa mbali na macho yako; Lakini ulisikia sauti ya dua yangu Wakati nilipokulilia.
²³ Mpendeni Bwana, Ninyi nyote mlio watauwa wake. Bwana huwahifadhi waaminifu, Humlipa atendaye kiburi malipo tele.
²⁴ Iweni hodari, mpige moyo konde, Ninyi nyote mnaomngoja Bwana.