Job 39.19
Bible en Swahili de l’est

¹ Je! Wajua majira ya kuzaa kwao mbuzi-mwitu walio majabalini? Au waweza kusema majira ya kuzaa kulungu? ² Je! Waweza kuhesabu miezi yao watakayoitimiza? Au je! Wajua majira ya kuzaa kwao? ³ Wao hujiinamisha, kuzaa watoto wao, Watupa taabu zao. ⁴ Watoto wao wa katika hali nzuri, hukua katika bara wazi; Huenda zao, wala hawarudi tena. ⁵ Ni nani aliyempeleka punda-milia aende huru? Au je! Ni nani aliyemfungulia vifungo punda-mwitu? ⁶ Ambaye nimeifanya nyika kuwa nyumba yake, Na nchi ya chumvi kuwa makao yake. ⁷ Yeye hudharau mshindo wa mji, Wala hasikii kelele zake msimamizi. ⁸ Upana wa milima ni malisho yake, Hutafuta-tafuta kila kitu kilicho kibichi. ⁹ Je! Nyati atakubali kukutumikia? Au atakaa katika zizi lako? ¹⁰ Je! Waweza kumfunga nyati kwa kamba matutani? Au, yeye atayalima mabonde nyuma yako? ¹¹ Je! Utamtumaini kwa sababu ana nguvu nyingi? Au, utamwachia yeye kazi yako? ¹² Je! Utamtumaini kwamba ataileta mbegu yako nyumbani. Na kukusanya nafaka ya kiwanja chako cha kupuria? ¹³ Bawa la mbuni hufurahi; Lakini mabawa yake na manyoya yake, je! Yana huruma? ¹⁴ Kwani yeye huyaacha mayai yake juu ya nchi, Na kuyatia moto mchangani, ¹⁵ Na kusahau kwamba yumkini mguu kuyavunja, Au mnyama wa mwitu kuyakanyaga. ¹⁶ yeye huyafanyia ukali makinda yake, kana kwamba si yake; Ijapokuwa taabu yake ni ya bure, hana hofu; ¹⁷ Kwa sababu Mungu amemnyima akili, Wala hakumpa fahamu. ¹⁸ Wakati anapojiinua juu aende, Humdharau farasi na mwenye kumpanda. ¹⁹ Je! Wewe ulimpa farasi uwezo wake? Au, ni wewe uliyemvika shingo yake manyoya yatetemayo? ²⁰ Ndiwe uliyemfanya aruke kama nzige? Fahari ya mlio wake hutisha. ²¹ Hupara-para bondeni, na kuzifurahia nguvu zake; Hutoka kwenda kukutana na wenye silaha. ²² Yeye hufanyia kicho dhihaka, wala hashangai; Wala hageuki kurudi nyuma mbele ya upanga. ²³ Podo humpigia makelele, Mkuki ung’aao na fumo. ²⁴ Huimeza nchi kwa ukali wake na ghadhabu; Wala hasimami kwa sauti ya baragumu. ²⁵ Kila ipigwapo baragumu yeye husema, Aha! Naye husikia harufu ya vita toka mbali, Mshindo wa maakida, na makelele. ²⁶ Je! Mwewe huruka juu kwa akili zako, Na kuyanyosha mabawa yake kwenda kusini? ²⁷ Je! Tai hupaa juu kwa amri yako, Na kufanya kioto chake mahali pa juu? ²⁸ Hukaa jabalini, ndiko kwenye malazi yake, Juu ya genge la jabali, na ngomeni. ²⁹ Toka huko yeye huchungulia mawindo; Macho yake huyaangalia toka mbali. ³⁰ Makinda yake nayo hufyonza damu; Na kwenye maiti ndiko aliko.