Proverbes 8.10
Bible en Swahili de l’est

L’activité de la sagesse

¹ Je! Hekima halii? Ufahamu hatoi sauti yake?
² Juu ya mahali palipoinuka karibu na njia, Penye njia panda, ndipo asimamapo.
³ Karibu na malango, mahali pa kuingia mjini, Mahali pa kuyaingilia malango anapiga kelele.
⁴ Enyi watu, nawaita ninyi; Na sauti yangu ni kwa wanadamu.
⁵ Enyi wajinga, fahamuni werevu, Nanyi wapumbavu, mpate moyo wa kufahamu.
⁶ Sikieni, maana nitasema yaliyo mazuri, Na kufumbua midomo yangu kutakuwa maadili.
⁷ Maana kinywa changu kitasema kweli, Na uovu ni chukizo kwa midomo yangu.
⁸ Maneno yote ya kinywa changu yana haki; Hapana hata neno lililopotoka au la ukaidi.
⁹ Yote humwelea yule afahamuye, Yote huelekea mbele yao waliopata maarifa.
¹⁰ Pokea mafundisho yangu, wala si fedha, Na maarifa kuliko dhahabu safi.
¹¹ Maana hekima ni bora kuliko marijani; Wala vyote vinavyotamanika havilingani nayo.
¹² Mimi, hekima, nimefanya werevu kuwa kao langu; Natafuta maarifa na busara.
¹³ Kumcha Bwana ni kuchukia uovu; Kiburi na majivuno, na njia mbovu, Na kinywa cha ukaidi pia nakichukia.
¹⁴ Shauri ni langu, na maarifa yaliyo sahihi; Mimi ni ufahamu, mimi nina nguvu.
¹⁵ Kwa msaada wangu wafalme humiliki, Na wakuu wanahukumu haki.
¹⁶ Kwa msaada wangu wakuu hutawala, Na waungwana, naam, waamuzi wote wa dunia.
¹⁷ Nawapenda wale wanipendao, Na wale wanitafutao kwa bidii wataniona.
¹⁸ Utajiri na heshima ziko kwangu, Naam, utajiri udumuo, na haki pia.
¹⁹ Matunda yangu hupita dhahabu, naam, dhahabu safi, Na faida yangu hupita fedha iliyo teule.
²⁰ Natembea katika njia ya haki, Katikati ya mapito ya hukumu.
²¹ Niwarithishe mali wale wanipendao, Tena nipate kuzijaza hazina zao.
²² Bwana alikuwa nami katika mwanzo wa njia yake, Kabla ya matendo yake ya kale.
²³ Nalitukuka tokea milele, tangu awali, Kabla haijawako dunia.
²⁴ Wakati visipokuwako vilindi nalizaliwa, Wakati zisipokuwako chemchemi zilizojaa maji.
²⁵ Kabla milima haijawekwa imara, Kabla ya vilima nalizaliwa.
²⁶ Alipokuwa hajaiumba dunia, wala makonde Wala chanzo cha mavumbi ya dunia;
²⁷ Alipozithibitisha mbingu nalikuwako; Alipopiga duara katika uso wa bahari;
²⁸ Alipofanya imara mawingu yaliyo juu; Chemchemi za bahari zilipopata nguvu;
²⁹ Alipoipa bahari mpaka wake, Kwamba maji yake yasiasi amri yake; Alipoiagiza misingi ya nchi;
³⁰ Ndipo nilipokuwa pamoja naye, kama stadi wa kazi; Nikawa furaha yake kila siku; Nikifurahi daima mbele zake;
³¹ Nikiifurahia dunia inayokaliwa na watu; Na furaha yangu ilikuwa pamoja na wanadamu.
³² Basi, wanangu, nisikilizeni sasa; Maana heri hao wazishikao amri zangu.
³³ Sikieni mafundisho, mpate hekima, Wala msiikatae.
³⁴ Ana heri mtu yule anisikilizaye, Akisubiri sikuzote malangoni pangu, Akingoja penye vizingiti vya milango yangu.
³⁵ Maana yeye anionaye mimi aona uzima, Naye atapata kibali kwa Bwana.
³⁶ Bali anikosaye hujidhuru nafsi yake mwenyewe, Na wao wanichukiao hupenda mauti.