Matthieu 17
Les Évangiles en Corse

¹ Sei ghjorni dopu Ghjesù piglia cun ellu à Petru, à Ghjacumu cù u fratellu Ghjuvanni è i si porta da parte nantu à un altu monte. ² Custì muta forma davanti à elli. È a so faccia lucia cum’è u sole, è i so panni eranu venuti bianchi cum’è a luce. ³ Ed eccu davanti à elli à Musè ed Elia chì ragiunavanu cun Ghjesù. ⁴ Tandu Petru piglia è dice à Ghjesù : « Signore, hè una campa pernoi di esse quì ; s’è tù voli, aghju da mette trè tende, una per tè,una per Musè è l’altra pè Elia. » ⁵ Mentre ch’ellu parlava, eccu un nulu luminosu chì i ingutuppa à tutti, è una voce falata da u nulu dice : « questu quì hè u mo figliolu predilettu, quellu chì mi ralegra. State lu à sente! » ⁶ Intesu isse parolle, i discepuli spaventati si lamponu di faccia in terra. ⁷ Ma Ghjesù si avvicinò, i tuccò di manu è li disse : « arritti è ùn abbiate paura ! » ⁸ Alzanu l’ochji è ùn vedenu chè à Ghjesù solu. ⁹ Ind’u mentre ch’elli falavanu da u monte, Ghjesù li cumanda cusì : « Ùn dite à nimu ciò chì s’hè palesu quì, prima di chì u Figliolu di l’Omu si sia arrittu da trà li morti. » ¹⁰ È tandu i discepuli li dumandonu : « ma cumu serà chì i maestri di a Lege dicenu ch’ellu ci vole prima ch’ellu venghi u prufetu Elia? » ¹¹ Ellu risponde : « hè vera chì Elia deve vene prima à assestà tuttu, ¹² ma eu vi dicu ch’ellu hè ghjuntu digià, ma ùn l’anu micca cunnisciutu è li anu fattu tuttu ciò ch’ella li paria. Cusì ancu à u Figliolu di l’Omu l’anu da fà soffre. » ¹³ Tandu i discepuli anu capitu ch’ellu vulia parlà di Ghjuvanni u Battistu. ¹⁴ Quand’elli ghjunghjenu avvulegju à a ghjente un omu si avvicina è si lampa in dinochje ¹⁵ dicendu : « Signore, abbii pietà di u mo figliolu: hà u malcadutu è soffre u castigu. Spessu si lampa ind’è u focu è spessu indè l’acqua. ¹⁶ L’aghju purtatu ind’è i to discepuli ma ùn l’anu pussutu guarì. » ¹⁷ È Ghjesù risponde è dice : « o leva infida è storta, sin’à quandu aghju da stà cun voi ? sin’à quandu v’aghju da suppurtà ? Purtate mi lu quì ! » ¹⁸ Ghjesù minacciò u demoniu è quellu iscì da u zitellu chì fù subitu guaritu. ¹⁹ Tandu i discepuli si avvicinanu, u piglianu da parte è li dicenu : « cumu hè chì no ùn l’avemu pussutu caccià noi ? » ²⁰ Ellu li disse : « hè per via di a vostra poca fede ; da veru, a vi dicu, chì s’è vo avete a fede, puru quant’è un granellucciu di mustarda, dicerete à sta muntagna : vai da quì à custì, è anderà ; è ùn ci serà nunda ch’è vo ùn possite fà. ²¹ [Ma quessi i demonii, ùn si ne vanu chè s’omu preca è s’omu face u dighjunu.] » ²² Cum’elli eranu inseme in Galilea, Ghjesù li disse : « u Figliolu di l’Omu deve esse messu in e manu di l’omi : ²³ l’anu da tumbà è hà da risuscità u terzu ghjornu. » Allora i discepuli funu tristi assai. ²⁴ Quand’elli ghjunsenu in Cafarnau, quelli chì tuccavanu u daziu di u tempiu dissenu à Petru : « u daziu, ùn lu paca micca u vostru maestru? » ²⁵ Petru rispose : « iè chì u paca. » Entruti in casa, Ghjesù parlò u primu è disse : « chì dici, o Simò ? Una tassa o un impositu, i rè di a terra à quale u facenu pacà : à i so figlioli o à i furesteri ? » ²⁶ Ellu rispose : « à i furesteri. » È Ghjesù disse : « dunque i figlioli ùn sò micca ubligati à pacà. ²⁷ Ma ùn femu scandalu ; vai à u mare, lampa l’ambu per piscà è u primu pesciu ch’è tù piglierai, apri li a bocca chì ci ai da truvà una muneta di argentu : piglia la è dà la per mè è per tè. »