Matthieu 14.22
Bible en Swahili de l’est

Exécution de Jean-Baptiste

¹ Wakati ule mfalme Herode alisikia habari za Yesu, akawaambia watumishi wake,
² Huyo ndiye Yohana Mbatizaji; amefufuka katika wafu; na kwa hiyo nguvu hizo zinatenda kazi ndani yake.
³ Maana Herode alikuwa amemkamata Yohana, akamfunga, akamtia gerezani, kwa ajili ya Herodia, mke wa Filipo nduguye.
⁴ Kwa sababu Yohana alimwambia, Si halali kwako kuwa naye.
⁵ Naye alipotaka kumwua, aliwaogopa watu, maana walimwona Yohana kuwa nabii.
⁶ Hata ilipofika sikukuu ya kuzaliwa kwake Herode, binti Herodia alicheza mbele ya watu, akampendeza Herode.
⁷ Hata akaahidi kwa kiapo ya kwamba atampa lo lote atakaloliomba.
⁸ Naye, huku akichochewa na mamaye, akasema, Nipe hapa katika kombe kichwa cha Yohana Mbatizaji.
⁹ Naye mfalme akasikitika; lakini kwa ajili ya viapo vyake, na kwa ajili ya wale walioketi chakulani pamoja naye, akaamuru apewe;
¹⁰ akatuma mtu, akamkata kichwa Yohana mle gerezani.
¹¹ Kichwa chake kikaletwa katika kombe, akapewa yule kijana; akakichukua kwa mamaye.
¹² Wanafunzi wake wakaenda, wakamchukua yule maiti, wakamzika; kisha wakaenda wakampasha Yesu habari.

Multiplication des pains pour cinq mille hommes

¹³ Naye Yesu aliposikia; hayo, aliondoka huko katika chombo, akaenda mahali pasipo watu, faraghani. Na makutano waliposikia, walimfuata kwa miguu kutoka mijini mwao.
¹⁴ Yesu akatoka, akaona mkutano mkuu, akawahurumia, akawaponya wagonjwa wao.
¹⁵ Hata kulipokuwa jioni, wanafunzi wake walimwendea, wakasema, Mahali hapa ni nyika tupu, na saa imekwisha pita; uwaage makutano, waende zao vijijini, wakajinunulie vyakula.
¹⁶ Yesu akawaambia, Hawana haja kwenda zao, wapeni ninyi vyakula.
¹⁷ Wakamwambia, Hamna kitu hapa ila mikate mitano na samaki wawili.
¹⁸ Akasema, Nileteeni hapa.
¹⁹ Akawaagiza makutano waketi katika majani; akaitwaa ile mikate mitano na wale samaki wawili, akatazama juu mbinguni, akabariki, akaimega ile mikate, akawapa wanafunzi, wanafunzi wakawapa makutano.
²⁰ Wakala wote wakashiba; wakayaokota masazo ya vipande vya mikate, vikapu kumi na viwili, vimejaa.
²¹ Nao waliokula walikuwa wanaume wapata elfu tano, bila wanawake na watoto.
²² Mara akawalazimisha wanafunzi wake wapande chomboni na kutangulia mbele yake kwenda ng’ambo, wakati yeye alipokuwa akiwaaga mkutano.
²³ Naye alipokwisha kuwaaga makutano, alipanda mlimani faraghani, kwenda kuomba. Na kulipokuwa jioni, alikuwako huko peke yake.
²⁴ Na kile chombo kimekwisha kufika katikati ya bahari, kinataabika sana na mawimbi; maana upepo ulikuwa wa mbisho.
²⁵ Hata wakati wa zamu ya nne ya usiku Yesu akawaendea, akienda kwa miguu juu ya bahari.
²⁶ Wanafunzi walipomwona akienda juu ya bahari, wakafadhaika, wakisema, Ni kivuli; wakapiga yowe kwa hofu.
²⁷ Mara Yesu alinena, akawaambia, Jipeni moyo ni mimi; msiogope.
²⁸ Petro akamjibu, akasema, Bwana, ikiwa ni wewe, niamuru nije kwako juu ya maji.
²⁹ Akasema, Njoo. Petro akashuka chomboni, akaenda kwa miguu juu ya maji, ili kumwendea Yesu.
³⁰ Lakini alipouona upepo, akaogopa; akaanza kuzama, akapiga yowe, akisema, Bwana, niokoe.
³¹ Mara Yesu akanyosha mkono wake, akamshika, akamwambia, Ewe mwenye imani haba, mbona uliona shaka?
³² Nao walipopanda chomboni, upepo ulikoma.
³³ Nao waliokuwamo ndani ya chombo wakamsujudia, wakisema, Hakika wewe u Mwana wa Mungu.
³⁴ Na walipokwisha kuvuka, walifika nchi ya Genesareti.
³⁵ Na watu wa mahali pale walipomtambua, walituma watu kwenda nchi zile zilizo kandokando, wakamletea wote waliokuwa hawawezi;
³⁶ nao wakamsihi waguse hata pindo la vazi lake tu; na wote waliogusa wakaponywa kabisa.