Proverbes 3.7
Bible en Swahili de l’est

¹ Mwanangu, usiisahau sheria yangu, Bali moyo wako uzishike amri zangu. ² Maana zitakuongezea wingi wa siku. Na miaka ya uzima, na amani. ³ Rehema na kweli zisifarakane nawe; Zifunge shingoni mwako; Ziandike juu ya kibao cha moyo wako. ⁴ Ndivyo utakavyopata kibali na akili nzuri, Mbele za Mungu na mbele ya mwanadamu. ⁵ Mtumaini Bwana kwa moyo wako wote, Wala usizitegemee akili zako mwenyewe; ⁶ Katika njia zako zote mkiri yeye, Naye atayanyosha mapito yako. ⁷ Usiwe mwenye hekima machoni pako; Mche Bwana, ukajiepushe na uovu. ⁸ Itakuwa afya mwilini pako, Na mafuta mifupani mwako. ⁹ Mheshimu Bwana kwa mali yako, Na kwa malimbuko ya mazao yako yote. ¹⁰ Ndipo ghala zako zitakapojazwa kwa wingi, Na mashinikizo yako yatafurika divai mpya. ¹¹ Mwanangu, usidharau kuadhibiwa na Bwana, Wala usione ni taabu kurudiwa naye. ¹² Kwa kuwa Bwana ampendaye humrudi, Kama vile baba mwanawe ampendezaye. ¹³ Heri mtu yule aonaye hekima, Na mtu yule apataye ufahamu. ¹⁴ Maana biashara yake ni bora kuliko biashara ya fedha, Na faida yake ni nyingi kuliko dhahabu safi. ¹⁵ Yeye ana thamani kuliko marijani, Wala vyote uvitamanivyo havilingani naye. ¹⁶ Ana wingi wa siku katika mkono wake wa kuume, Utajiri na heshima katika mkono wake wa kushoto. ¹⁷ Njia zake ni njia za kupendeza sana, Na mapito yake yote ni amani. ¹⁸ Yeye ni mti wa uzima kwao wamshikao sana; Ana heri kila mtu ashikamanaye naye. ¹⁹ Kwa hekima Bwana aliiweka misingi ya nchi; Kwa akili zake akazifanya mbingu imara; ²⁰ Kwa maarifa yake vilindi viligawanyika; Na mawingu yadondoza umande. ²¹ Mwanangu, yasiondoke haya machoni pako, Shika hekima kamili na busara. ²² Basi yatakuwa uzima kwa nafsi yako, Na neema shingoni mwako. ²³ Ndipo utakapokwenda katika njia yako salama, Wala mguu wako hautakwaa. ²⁴ Ulalapo hutaona hofu; Naam, utalala na usingizi wako utakuwa mtamu. ²⁵ Usiogope hofu ya ghafula, Wala uharibifu wa waovu utakapofika. ²⁶ Kwa kuwa Bwana atakuwa tumaini lako, Naye atakulinda mguu wako usinaswe. ²⁷ Usiwanyime watu mema yaliyo haki yao, Ikiwa katika uwezo wa mkono wako kuyatenda. ²⁸ Usimwambie jirani yako, Nenda, urudi halafu, na kesho nitakupa; Nawe unacho kitu kile karibu nawe. ²⁹ Usiwaze mabaya juu ya jirani yako, Ambaye anakaa karibu nawe na kujiona salama. ³⁰ Usishindane na mtu bila sababu, Ikiwa hakukudhuru kwa lo lote. ³¹ Usimhusudu mtu mwenye jeuri, Wala usiichague mojawapo ya njia zake. ³² Maana mtu mkaidi ni chukizo kwa Bwana, Bali siri yake ni pamoja na wanyofu. ³³ Laana ya Bwana i katika nyumba ya waovu, Bali huibariki maskani ya mwenye haki. ³⁴ Hakika yake huwadharau wenye dharau, Bali huwapa wanyenyekevu neema. ³⁵ Wenye hekima wataurithi utukufu, Bali kukuzwa kwa wapumbavu ni fedheha.