Matthieu 14
Les Évangiles en Corse

¹ Tandu Erode u tetrarca vense à sente a nomina di Ghjesù è disse à i so servi : ² « Questu hè Ghjuvanni u Battistu ; s’hè discitatu da trà li morti è pè via di què, in ellu sò à l’opara i miraculi. » ³ Chì Erode, dopu pigliatu à Ghjuvanni l’avia ligatu è messu in prighjò pè via di Erodiade, a moglia di u fratellu Filippu. ⁴ Chì Ghjuvanni li dicia : « Ùn t’hè cuncessa di tene la. » ⁵ Ma, puru ch’ellu u vulessi tumbà, timì a folla chì u tenia da prufetu. ⁶ Ghjuntu l’anniversariu di Erode, a figliola di Erodiade si messe à ballà à mezu à a ghjente è piacì à Erode ; ⁷ Tandu cun ghjuramentu prumesse di dà li ciò ch’ell’avia chersu. ⁸ È, cunsigliata da a mamma, ella disse : « dà mi nant’à un piattu u capu di Ghjuvanni u Battistu. » ⁹ È u rè fù afflittu, ma pè via di i so ghjuramenti è di quelli attavulinati cun ellu, cumandò ch’ellu li fussi datu, ¹⁰ è mandò à qualchissia à muzzà u capu à Ghjuvanni in prighjò ¹¹ è u capu fù arricatu nant’à un piattu è datu à a zitella, è ella u purtò à a mamma. ¹² È ghjunti à u locu, i discepuli caccionu a salma è a seppellinu, è andonu à purtà a nova à Ghjesù. ¹³ Intesu cusì, Ghjesù partì da quallà cù a barca ver di un locu desertu scantatu. Intesu ne a nutizia, e folle u suvitonu à pedi da e cità. ¹⁴ È dopu sbarcatu, vide tamanta folla è fù cummossu à l’anima per isse ghjente, è guarì i so infermi. ¹⁵ Toccu a sera, i discepuli vensenu ind’è ellu dicendu : « desertu hè u locu, è l’ora hè trapassata ; rimanda e folle in i so paesi, ch’elle si possinu cumprà da manghjà. » ¹⁶ Tandu ellu disse : « Ùn anu bisognu d’andà, date li voi da manghjà. » ¹⁷ Elli li dissenu : « quì avemu solu cinque pani è dui pesci. » ¹⁸ Ellu disse : « arricate mi li quì. » ¹⁹ È cumandatu à e folle di pusà in l’erba, pigliò i cinque pani è i dui pesci è pisatu l’ochji ver di u celu, disse a benedizione poi, spartutu i pani i dete à i discepuli, è i discepuli à e folle. ²⁰ È tutti manghjonu è funu sazii, è si ricusse ciò chì avanzava di pezzi : dodeci coffe piene. ²¹ Quelli chì manghjavanu eranu cinquemila omi, da più à menu, cacciatu e donne è i zitelli. ²² È subitu cumandò à i discepuli ch’elli cullessinu in barca è tirà avanti à via di l’altra sponda intantu ch’ellu rimandessi e folle. ²³ È dopu avè lasciatu andà e folle, cullò fin’à u monte pè pricà in un locu scantatu. Ghjunta a sera, era solu. ²⁴ A barca era ghjà bellu luntanu da a terra, ciambuttata da i marosuli, chì u ventu era cuntrariu. ²⁵ È à u finì di a notte, vense à truvà li viaghjendu nant’à u mare. ²⁶ È i discepuli, videndu lu viaghjà nant’à u mare, funu frasturnati, dicendu : « hè una fantomia » ; è gridavanu di paura. ²⁷ È subitu ellu li parlò dicendu : « curagiu chì sò eu, ùn abbiate paura. » ²⁸ Li risponde Petru è li dice : « o Signore, s’è tù sì tù, cumanda ch’eu venghi à truvà ti annant’à l’acque. » ²⁹ Tandu li disse : « veni ! » È falatu da a barca, Petru viaghjò nant’à l’acque per andà à truvà à Ghjesù ; ³⁰ tandu vistu u ventu, si pigliò di paura, è, cum’ellu principiava à annigà si, gridò dicendu : « o Signore, salvami. » ³¹ Tandu subitu Ghjesù stende a manu, l’agguanta, è li dice : « omu di poca fede, cum’hè ch’è tù ai dubbitatu ? » ³² Cullati ch’elli funu in barca, u ventu stanciò ³³ Tandu quelli in a barca li si indinuchjonu davanti, dicendu : « sì propiu u figliolu di Diu. » ³⁴ È toccu l’altra sponda accustonu da e parti di Ghjenesarè. ³⁵ È l’omi d’issu locu, ricunniscendu lu, a mandonu à dì in tuttu u rughjone vicinu è li purtonu tutti quelli chì avianu un male, ³⁶ è u pricuronu di pudè tuccà solu l’arice di u so mantellu. È tutti quelli chì tuccavanu eranu salvi.