Matthieu 13
Les Évangiles en Corse

¹ Quellu ghjornu Ghjesù esce di casa è si posa à tagliu di mare. ² Da tantu ch’elle li s’accoglienu e folle in giru, colla ind una barca, ci si mette à pusà è a ghjente stava arritta nantu à a sponda. ³ È li parlò assai per parabule. Dicia : ⁴ « ci era un suminatore chì era andatu à suminà. È mentre ch’ellu suminava, une poche di granelle casconu longu à a strada, è l’acelli vensenu à biccà le. ⁵ Altre sumente casconu in una petrichiccia chì a tarra era poca. Crescinu subitu per via chì a terra ùn era micca prufonda ; ⁶ ma quand’ellu surtì u sole, e piccule piante funu brusgiate è siccate chì e radiche ùn eranu micca forte. ⁷ Altre dinò casconu in un prunicaghju : u prunicaghju crescì è e stirpò. ⁸ Ma una manata era cascata in la terra bona è dete u so fruttu, à chì centu, à chì sessanta à chì trenta. ⁹ À chì hà arechje, ch’ellu senti. » ¹⁰ I discepuli s’avvicinanu è li dicenu : « ma chì li parli in parabule ? » ¹¹ Ghjesù risponde è dice : « perchè chì à voi v’hè statu datu di sapè i misteri di u regnu di i celi, ma à elli nò. ¹² Chì à quellu chì hà, li si derà è per ellu serà divizia ; invece à quellu chì ùn hà tantu, li si caccerà ancu ciò ch’ellu hà. ¹³ Hè per quessa ch’è li parlu in parabule, chì vedenu senza vede è sentenu senza sente nè capì. ¹⁴ Cusì vene cumpiita a prufezia di Isaia :
sente, senterete, ma ùn capiscerete,
guardà, guardarete ma ùn ci viderete. ¹⁵ Chì u core di stu populu hè diventatu duru,
è si sò tappati l’arechje
è si sò tappati l’ochji
da ùn vede più cù l’ochji
nè sente cù l’arechje,
nè capì nè cunvertisce si cù u core
nè lascià si guarì da mè.’

¹⁶ Invece voi, beati i vostri ochji chì vedenu, è e vostre arechje chì sentenu. ¹⁷ Da veru a vi dicu, ci n’hè statu assai prufeti è omi ghjusti chì anu bramatu di vede ciò ch’è vo vidite, è ùn l’anu micca vista, è di sente ciò ch’è vo sentite, ma ùn l’anu micca intesa. » ¹⁸ « Dunque voi, state à sente a parabula di u suminatore. ¹⁹ À chì sente a parolla di u Regnu è ùn la capisce, vene u Mastinu è si piglia ciò chì hè statu suminatu in u so core ; ebbè, quessu hè quellu chì hè statu suminatu longu à a strada. ²⁰ Quellu chì hè statu suminatu in a petrichiccia, hè quellu chì hà intesu a parolla è l’hà pigliata subitu cù alegria, ²¹ ma ùn hà nè radiche nè custanza in sè stessu ; da ch’ellu scontra e tribulazione o e persecuzione per via di a parolla, subitu intrampuleghja è casca. ²² Quellu chì hè statu suminatu in u prunicaghju hè quellu chì hà intesu a parolla ma e primure di u mondu è l’inganni di a ricchezza assuffocanu a parolla chì si secca. ²³ Ma quellu chì hè statu suminatu in a terra bona, hè quellu chì hà intesu a parolla è l’hà capita ; a face fruttà è rende à chì centu, à chì sessanta à chì trenta. » ²⁴ È po li presenta un antra parabula dicendu : « u regnu di i celi hè cum’è quandu un omu suminò a sumenta bona in u so chjosu. ²⁵ In lu mentre chì l’omi durmianu, u so nimicu ghjunse è misse a rimigna avvuleghju à u granu è po si n’andete. ²⁶ Quandu u granu cuminciò à creà si è à mette e spiche, spuntò ancu a rimigna. ²⁷ Tandu l’omi dissenu : ‘o Patrone, ùn aviate messu una sumenta bona in u chjosu ? Da duve vene po issa rimigna ?’ ²⁸ Ellu li disse : ‘quessa, l’hà fatta un nimicu.’ L’omi dissenu : ‘vulete ch’è no vachimu à caccià la ?’ ²⁹ Quellu disse : ‘innò chì, s’è vo cacciate a rimigna ete da stradicà ancu u granu. ³⁰ Lasciate li crece inseme sinu à a sighera è, à l’epica di a sighera, diceraghju à i sigatori : cacciate prima a rimigna è fate ne fasci da brusgià, invece u granu, riguarate lu tuttu in u mo granaghju.’  » ³¹ È po li presenta una antra parabula dicendu : « u regnu di i celi hè cum’è un granellu di senapa chì un omu suminò in u so chjosu. ³² Quessa hè a più chjuca trà tutte e sumente ma quand’ella hè crisciuta, vene a più grande di l’ortu è diventa un arburu, tamantu chì l’acelli facenu i so nidi in e ramelle. »

³³ Li fece dinò una antra parabula : « u regnu di i celi hè cum’è u levitu chì una donna pigliò è mischjò cù trè bacini di farina, sinu à ch’ellu leviteghji u pastone sanu. » ³⁴ Tuttu què, Ghjesù a dicia in parabule, è ùn li dicia nunda senza parlà in parabule, ³⁵ da ch’ella venga cumpiita a parolla di Diu, detta da u prufeta :
aghju da apre a bocca per parlà in parabule
aghju da annunzià cose piatte
dapoi a creazione di u mondu.’
³⁶ Dopu Ghjesù s’alluntana da e folle è và in casa. I discepuli s’avvicinanu è li dicenu : « spieca ci a parabula di a rimigna di u chjosu. » ³⁷ Ghjesù risponde è dice : « quellu chì sumena a sumenta bona hè u Figliolu di l’Omu, ³⁸ u chjosu hè u mondu, a sumenta bona sò i figlioli di u regnu; a rimigna sò i figlioli di u Male, ³⁹ u nimicu chì l’hà suminata hè u diavule, a sighera hè a fine di u mondu è i sigatori sò l’anghjuli. ⁴⁰ Or cumu ellu si caccia a rimigna è si lampa in u focu, cusì serà a fine di istu mondu. ⁴¹ U Figliolu di l’Omu manderà i so anghjuli è quelli cacceranu da u so regnu tutte e cause di scandalu, è quelli chì facenu l’inghjustizie. ⁴² I lamperanu in bocca à u focu : custì ci seranu pienti è chirchenni. ⁴³ Tandu l’omi ghjusti splenderanu cum’è u sole in u regnu di Diu u Babbu. À chì hà arechje, ch’ellu senti. » ⁴⁴ « U regnu di i celi hè cum’è un tesoru piattu in un chjosu. L’omu chì l’hà trovu u torna à piattà, è, da tanta l’alegria, parte è vende tuttu u soiu, è po compra issu chjosu. ⁴⁵ « U regnu di i celi hè dinò cum’è quandu un marcante hè in cerca di perule preziose ; ⁴⁶ truvatu ch’ellu hà una perula d’altu valore parte è vende tuttu u soiu, è po compra issa perula. ⁴⁷ « U regnu di i celi hè dinò cum’è una reta lampata è chì riguara pesci d’ogni generu ; ⁴⁸ piena ch’ella hè, i piscadori a tiranu nantu à a rena, posanu è sceglienu i pesci ; i belli i mettenu in e panere, i merzi i ghjettanu. ⁴⁹ Cusì serà à a fine di stu mondu : ⁵⁰ veneranu l’anghjuli à caccià i gattivi da trà i ghjusti è i lamperanu in bocca à u focu : custì ci seranu pienti è chirchenni. » ⁵¹ « Avite capitu tutte ste cose ? » Elli dicenu : « iè chì l’emu capite. » ⁵² È ellu dice : « hè per quessa chì un scribu chì tornassi discepulu di u regnu di i celi sarebbe cum’è un capifamiglia chì caccia da u so tesoru cose vechje è cose nove. » ⁵³ Finite isse parabule, Ghjesù partì da quelle loche. ⁵⁴ Andete in a so patria è messe à insignà à a ghjente in a sinagoga. Si maravigliavanu è dicianu : « issa saviezza è issa putenza, da duve e caccia ? ⁵⁵ Ùn hè u figliolu di u bancalaru ? A mamma ùn si chjama Maria? I fratelli ùn sò Ghjacumu, Ghjiseppu, Simone è Ghjuda ? ⁵⁶ È e surelle ùn stanu tutte quì cù noi ? Da induve e caccia po tutte isse cose ? » ⁵⁷ Eranu scandalizati da Ghjesù. Ellu li disse : « un prufeta hè disprezzatu solu,in a so patria è in casa soia. » ⁵⁸ È ùn fece tanti miraculi custì, per via di issa disfidenza ch’elli avianu.