Job 20
Bible en Swahili de l’est

¹ Ndipo Sofari, Mnaamathi, akajibu, na kusema, ² Kwa hiyo mawazo yangu hunipa jawabu, Kwa ajili ya haraka niliyo nayo ndani yangu. ³ Nimesikia maonyo yanayonitahayarisha, Nayo roho ya ufahamu wangu hunijibu. ⁴ Je! Hujui neno hili tangu zamani za kale, Tangu wanadamu kuwekwa juu ya nchi, ⁵ Ya kuwa shangwe ya waovu ni kwa muda kidogo, Na furaha ya wapotovu ni ya dakika moja tu? ⁶ Ujapopanda ukuu wake mpaka mbinguni, Na kichwa chake kufikilia mawinguni; ⁷ Hata hivyo ataangamia milele kama mavi yake mwenyewe; Hao waliomwona watasema, Yuko wapi? ⁸ Ataruka mfano wa ndoto, asionekane; Naam, atafukuzwa kama maono ya usiku, ⁹ Jicho lililomwona halitamwona tena; Wala mahali pake hapatamtazama tena. ¹⁰ Watoto wake watataka fadhili kwa maskini, Na mikono yake itarudisha mali yake. ¹¹ Mifupa yake imejaa ujana wake, Lakini utalala nchi naye mavumbini. ¹² Ingawa uovu una tamu kinywani mwake, Ingawa auficha chini ya ulimi wake; ¹³ Ingawa auhurumia, asikubali kuuacha uende zake. Lakini akaushika vivyo kinywani mwake; ¹⁴ Hata hivyo chakula chake matumboni mwake kinabadilika, Kimekuwa ni nyongo za majoka ndani yake. ¹⁵ Amemeza mali, naye atayatapika tena; Mungu atayatoa tumboni mwake. ¹⁶ Ataamwa sumu ya majoka; Na ulimi wa fira utamwua. ¹⁷ Hataiangalia hiyo mito ya maji, Vile vijito vilivyojaa asali na siagi. ¹⁸ Aliyoyataabikia kazi atayarudisha, asiyameze; Kwa mali aliyoyapata, hatafurahi. ¹⁹ Kwa maana amewaonea na kuwaacha maskini; Amenyang’anya nyumba kwa jeuri, wala hataijenga. ²⁰ Kwa sababu hakujua utulivu ndani yake, Hataponya cho chote katika hicho alichokifurahia. ²¹ Hakikusalia kitu asichokula; Kwa hiyo kufanikiwa kwake hakutadumu. ²² Katika kujaa kwa wingi wake atakuwa katika dhiki; Mkono wa kila anayesumbuliwa utamjia. ²³ Hapo atakapo kulijaza tumbo lake, Mungu atamtupia ukali wa ghadhabu zake, Na kuunyesha juu yake akiwa anakula. ²⁴ Ataikimbia silaha ya chuma, Na uta wa shaba utamchoma kwa pili. ²⁵ Yeye autoa, nao watoka mwilini mwake; Naam, ncha ing’aayo yatoka katika nyongo yake; Vitisho viko juu yake. ²⁶ Giza lote linawekwa kwa ajili ya hazina zake; Moto ambao haukuvuviwa na mtu utamla; Utayateketeza yaliyosalia hemani mwake. ²⁷ Mbingu zitafunua wazi uovu wake, Nayo nchi itainuka kinyume chake. ²⁸ Maongeo ya nyumba yake yataondoka, Yatamwagika mbali katika siku ya ghadhabu zake. ²⁹ Hii ndiyo sehemu ya mtu mwovu itokayo kwa Mungu, Na urithi aliowekewa na Mungu.