Psaumes 104.5
Bible en Swahili de l’est

¹ Ee nafsi yangu, umhimidi Bwana. Wewe, Bwana, Mungu wangu, Umejifanya mkuu sana; Umejivika heshima na adhama. ² Umejivika nuru kama vazi; Umezitandika mbingu kama pazia; ³ Na kuziweka nguzo za orofa zake majini. Huyafanya mawingu kuwa gari lake, Na kwenda juu ya mabawa ya upepo, ⁴ Huwafanya malaika zake kuwa pepo, Na watumishi wake kuwa moto wa miali. ⁵ Uliiweka nchi juu ya misingi yake, Isitikisike milele. ⁶ Uliifunika kwa vilindi kama kwa vazi, Maji yalikuwa yakisimama juu ya milima. ⁷ Kwa kukemea kwako yakakimbia, Kwa sauti ya radi yako yakaenda zake kasi, ⁸ Yakapanda milima, yakatelemka mabondeni, Mpaka mahali ulipoyatengenezea. ⁹ Umeweka mpaka yasiupite, Wala yasirudi kuifunikiza nchi. ¹⁰ Hupeleka chemchemi katika mabonde; Zapita kati ya milima; ¹¹ Zamnywesha kila mnyama wa kondeni; Punda mwitu huzima kiu yao. ¹² Kandokando hukaa ndege wa angani; Kati ya matawi hutoa sauti zao. ¹³ Huinywesha milima toka orofa zake; Nchi imeshiba mazao ya kazi zako. ¹⁴ Huyameesha majani kwa makundi, Na maboga kwa matumizi ya mwanadamu; Ili atoe chakula katika nchi, ¹⁵ Na divai imfurahishe mtu moyo wake. Aung’aze uso wake kwa mafuta, Na mkate umburudishe mtu moyo wake. ¹⁶ Miti ya Bwana nayo imeshiba, Mierezi ya Lebanoni aliyoipanda. ¹⁷ Ndimo ndege wafanyamo vitundu vyao, Na korongo, misunobari ni nyumba yake. ¹⁸ Milima mirefu ndiko waliko mbuzi wa mwitu, Na magenge ni kimbilio la wibari. ¹⁹ Aliufanya mwezi kwa ajili ya nyakati, Jua latambua kuchwa kwake. ²⁰ Wewe hufanya giza, kukawa usiku, Ndipo atambaapo kila mnyama wa mwitu. ²¹ Wana-simba hunguruma wakitaka mawindo, Ili kutafuta chakula chao kwa Mungu. ²² Jua lachomoza, wanakwenda zao, Na kujilaza mapangoni mwao. ²³ Mwanadamu atoka kwenda zake kazini, Na kwenye utumishi wake mpaka jioni. ²⁴ Ee Bwana, jinsi yalivyo mengi matendo yako! Kwa hekima umevifanya vyote pia. Dunia imejaa mali zako. ²⁵ Bahari iko kule, kubwa na upana, Ndimo mlimo viendavyo visivyohesabika, Viumbe hai vidogo kwa vikubwa. ²⁶ Ndimo zipitamo merikebu, Ndimo alimo lewiathani uliyemwumba acheze humo. ²⁷ Hao wote wanakungoja Wewe, Uwape chakula chao kwa wakati wake. ²⁸ Wewe huwapa, Wao wanakiokota; Wewe waukunjua mkono wako, Wao wanashiba mema; ²⁹ Wewe wauficha uso wako, Wao wanafadhaika; Waiondoa pumzi yao, wanakufa, Na kuyarudia mavumbi yao, ³⁰ Waipeleka roho yako, wanaumbwa, Nawe waufanya upya uso wa nchi. ³¹ Utukufu wa Bwana na udumu milele; Bwana na ayafurahie matendo yake. ³² Aitazama nchi, inatetemeka; Aigusa milima, inatoka moshi. ³³ Nitamwimbia Bwana maadamu ninaishi; Nitamshangilia Mungu wangu nikiwa hai; ³⁴ Kutafakari kwangu na kuwe kutamu kwake; Mimi nitamfurahia Bwana. ³⁵ Wenye dhambi waangamizwe katika nchi, Watendao ubaya wasiwepo tena. Ee nafsi yangu, umhimidi Bwana.