Psaumes 44.3
Bible en Swahili de l’est

Prière d’Israël opprimé

¹ Ee Mungu, tumesikia kwa masikio yetu Baba zetu wametuambia, Matendo uliyoyatenda siku zao, siku za kale.
² Wewe kwa mkono wako uliwafukuza mataifa, Ukawakalisha wao. Wewe uliwatesa watu wa nchi, Ukawaeneza wao.
³ Maana si kwa upanga wao walivyoimiliki nchi, Wala si mkono wao uliowaokoa; Bali mkono wako wa kuume, naam, mkono wako, Na nuru ya uso wako, kwa kuwa uliwaridhia.
⁴ Ee Mungu, Wewe ndiwe mfalme wangu, Uagize mambo ya wokovu kwa Yakobo.
⁵ Kwa nguvu zako tutawaangusha watesi wetu; Kwa jina lako tutawakanyaga watupingao.
⁶ Maana sitautumainia upinde wangu, Wala upanga wangu hautaniokoa.
⁷ Bali Wewe ndiwe uliyetuokoa na watesi wetu; Na watuchukiao umewaaibisha.
⁸ Tumejisifia Mungu mchana kutwa, Na jina lako tutalishukuru milele.
⁹ Lakini umetutupa, umetufedhehesha, Wala hutoki na majeshi yetu.
¹⁰ Waturudisha nyuma tukampa mtesi kisogo, Na watuchukiao wanajipatia mateka.
¹¹ Umetutoa kama kondoo tuwe chakula, Na kututawanya kati ya mataifa.
¹² Wawauza watu wako bila kupata mali, Wala hukupata faida kwa thamani yao.
¹³ Umetufanya kuwa lawama kwa jirani zetu, Mzaha na dhihaka kwao wanaotuzunguka.
¹⁴ Umetufanya kuwa mithali kwa mataifa, Sababu ya kutikisa kichwa kwa watu wa nchi.
¹⁵ Mchana kutwa fedheha yangu i mbele yangu, Na haya ya uso wangu imenifunika,
¹⁶ Kwa sauti ya mwenye kulaumu na kukufuru, Kwa sababu ya adui na mjilipiza kisasi.
¹⁷ Haya yote yametupata, bali hatukukusahau, Wala hatukulihalifu agano lako.
¹⁸ Hatukuiacha mioyo yetu irudi nyuma, Wala hatua zetu hazikuiacha njia yako.
¹⁹ Hata utuponde katika kao la mbwa-mwitu, Na kutufunika kwa uvuli wa mauti.
²⁰ Ikiwa tumelisahau jina la Mungu wetu, Au kumnyoshea mungu mgeni mikono yetu;
²¹ Je! Mungu hatalichunguza neno hilo? Maana ndiye azijuaye siri za moyo.
²² Hasha! Kwa ajili yako tunauawa mchana kutwa; Tunafanywa kondoo waendao kuchinjwa.
²³ Amka, Bwana, mbona umelala? Ondoka, usitutupe kabisa.
²⁴ Mbona unatuficha uso wako, Na kusahau kuonewa na kudhulumiwa kwetu?
²⁵ Maana nafsi yetu imeinama mavumbini, Tumbo letu limegandamana na nchi.
²⁶ Uondoke, uwe msaada wetu, Utukomboe kwa ajili ya fadhili zako.