Proverbes 20.5
Bible en Swahili de l’est

¹ Mvinyo hudhihaki, kileo huleta ugomvi; Na akosaye kwa vitu hivyo hana hekima. ² Utisho wa mfalme ni kama ngurumo ya simba; Amkasirishaye huitendea dhambi nafsi yake. ³ Mtu kujitenga na ugomvi ni heshima kwake; Bali kila mpumbavu ataka kugombana. ⁴ Mtu mvivu hataki kulima wakati wa baridi; Hivyo wakati wa mavuno ataomba, hana kitu. ⁵ Mashauri ya moyoni ni kama kilindi; Lakini mtu mwenye ufahamu atayateka. ⁶ Wanadamu hutangaza kila mtu hisani yake mwenyewe; Bali mtu aliye mwaminifu, ni nani awezaye kumpata? ⁷ Mwenye haki aendaye katika unyofu wake, Watoto wake wabarikiwa baada yake. ⁸ Mfalme aketiye katika kiti cha hukumu, Huyapepeta mabaya yote kwa macho yake. ⁹ Nani awezaye kusema, Nimesafisha moyo wangu; Nimetakasika dhambi yangu? ¹⁰ Vipimo mbalimbali, na pishi mbalimbali, Vyote viwili ni chukizo kwa Bwana. ¹¹ Hata mtoto hujijulisha kwa matendo yake; Kwamba kazi yake ni safi, kwamba ni adili. ¹² Sikio lisikialo, na jicho lionalo, Bwana ndiye aliyeyafanya yote mawili. ¹³ Usipende usingizi usije ukawa maskini; Fumbua macho yako nawe utashiba chakula. ¹⁴ Haifai kitu, haifai kitu, asema mnunuzi; Lakini akiisha kwenda zake hujisifu. ¹⁵ Dhahabu iko, na marijani tele; Lakini midomo ya maarifa ni kito cha thamani. ¹⁶ Twaa nguo yake amdhaminiye mgeni; Mtoze rehani aliye mdhamini wa wageni. ¹⁷ Chakula cha uongo ni kitamu kwa mtu; Lakini halafu kinywa chake kitajaa changarawe. ¹⁸ Kila kusudi huthibitika kwa kushauriana; Na kwa shauri la akili fanya vita. ¹⁹ Mwenye kitango akisingizia hufunua siri; Basi, usishirikiane naye afunuaye midomo yake sana. ²⁰ Amlaaniye babaye au mamaye, Taa yake itazimika katika giza kuu. ²¹ Urithi uliopatikana mwanzo kwa haraka, Mwisho wake, lakini, hautabarikiwa. ²² Usiseme, Mimi nitalipa mabaya; Mngojee Bwana, naye atakuokoa. ²³ Vipimo mbalimbali ni chukizo kwa Bwana; Tena mizani ya hila si njema. ²⁴ Mwenendo wa mtu watoka kwa Bwana; Basi, awezaje mtu kuelewa na njia yake? ²⁵ Ni mtego, mtu aseme kwa haraka, Kitu hiki ni wakfu; Na baada ya kuweka nadhiri kuuliza-uliza habari. ²⁶ Mfalme mwenye hekima huwapepeta wasio haki; Naye hulipitisha gurudumo la kupuria juu yao. ²⁷ Pumzi ya mwanadamu ni taa ya Bwana; Hupeleleza yote yaliyomo ndani yake. ²⁸ Fadhili na uaminifu humhifadhi mfalme, Na kiti chake cha enzi huthibitishwa kwa fadhili. ²⁹ Fahari ya vijana ni nguvu zao, Na uzuri wa wazee ni kichwa chenye mvi. ³⁰ Machubuko ya fimbo husafisha uovu, Na mapigo hufikilia ndani ya mtima.