Job 36.5
Bible en Swahili de l’est

Le sort des justes et des coupables

¹ Tena Elihu akaendelea na kusema,
² Ningojee kidogo nami nitakueleza; Kwa kuwa nikali na maneno kwa ajili ya Mungu.
³ Nitayaleta maarifa yangu kutoka mbali, Nami nitampa haki Muumba wangu.
⁴ Kwani yakini maneno yangu si ya uongo; Aliyekamilika katika maarifa yu pamoja nawe.
⁵ Tazama, Mungu ni hodari, wala hamdharau mtu ye yote; Ana uweza katika nguvu za fahamu.
⁶ Hauhifadhi uhai wa waovu; Lakini huwapa wateswao haki yao.
⁷ Yeye hawaondolei macho yake wenye haki; Lakini pamoja na wafalme huwaweka Katika viti vya enzi milele, nao hutukuzwa.
⁸ Nao wakifungwa kwa pingu, Wakitwaliwa kwa kamba za mateso;
⁹ Ndipo huwaonyesha matendo yao, Na makosa yao, ya kuwa wametenda kwa kujivuna.
¹⁰ Yeye huyafunua masikio yao, wasikie maonyo, Na kuwaagiza warudi kuuacha uovu.
¹¹ Kama wakisikia na kumtumikia, Watapisha siku zao katika kufanikiwa, Na miaka yao katika furaha.
¹² Lakini wasiposikia, wataangamia kwa upanga, Nao watakufa pasipo maarifa.
¹³ Lakini hao wasiomcha Mungu mioyoni hujiwekea hasira Hawalilii msaada hapo awafungapo.
¹⁴ Wao hufa wakali vijana, Na uhai wao huangamia katikati ya wachafu.
¹⁵ Yeye humponya aliyetaabika kwa njia ya taabu yake, Na kuyafunua masikio yao kwa maonevu.
¹⁶ Naam, yeye angekuongoza utoke katika msiba Hata mahali penye nafasi, ambapo hapana msonge; Na kilichowekwa mezani pako kingejaa mafuta.
¹⁷ Lakini umejaa hukumu ya waovu; Hukumu na haki hukushika.
¹⁸ Basi ujitunze, isije hasira ikakuvuta hata ukafanya mzaha; Wala usikubali ukuu wa ukombozi ukugeuze.
¹⁹ Je! Mali yako yatatosha, hata usiwe katika taabu, Au uwezo wote wa nguvu zako?
²⁰ Usiutamani usiku, Wakati watu wakatwapo katika mahali pao.
²¹ Jitunze, usiutazame uovu; Kwani umeuchagua huo zaidi ya taabu.
²² Tazama, Mungu hutenda makuu kwa uweza wake; Ni nani afundishaye kama yeye?
²³ Ni nani aliyemwagiza njia yake? Au ni nani awezaye kusema, Wewe umetenda yasiyo haki?
²⁴ Kumbuka kuitukuza kazi yake, Watu waliyoiimbia.
²⁵ Wanadamu wote wameitazama; Watu huiangalia kwa mbali
²⁶ Tazama, Mungu ni mkuu, nasi hatumjui; Hesabu ya miaka yake haitafutiki.
²⁷ Kwani yeye huvuta juu matone ya maji, Yamwagikayo katika mvua kutoka kungeni mwake;
²⁸ Ambayo mawingu yainyesha Na kudondoza juu ya wanadamu kwa wingi.
²⁹ Naam, mtu aweza kuelewa na matandazo ya mawingu, Ngurumo za makao yake?
³⁰ Tazama, yeye huutandaza mwanga wake, umzunguke; Naye hufunika vilindi vya bahari.
³¹ Kwani huwahukumu kabila za watu kwa njia hizi; Hutoa chakula kwa ukarimu.
³² Yeye huifunika mikono yake kwa umeme; Na kuuagiza shabaha utakayopiga.
³³ Mshindo wake hutoa habari zake, Anayewaka hasira juu ya uovu.